سێ ساڵ بەسەر كۆچی دوایی مامۆستا مەلا محەمەدی بەحركە تێدەپەڕێت

PUKMEDIA

مامۆستا مەلا محەمەد بەحركەیی

سێ ساڵ بەسەر كۆچی دوایی مامۆستا مەلا محەمەدی بەحركە تێكۆشەری دێرین و كۆڵنەدەری بزوتنەوەی كوردایەتیدا تێدەپەڕێت، كە یەكێك بوو لە شۆڕشگێڕە دیارەكانی شۆڕشی نوێ و هەمیشە بەبیروباوەڕ و دڵسۆزییەوە بێدرێغ لە كۆڕی خەباتدا بەردەوام بووە، لەتەمەنی خەبات و كوردایەتی خۆیدا تووشی سەختی و ناڕەحەتی زۆر بوەە، بەڵام ئەوانە لە خەباتكردن و تێكۆشان ساردینەكردەوە.

مامۆستا مەلا محەمەدی بەحركە كەسایەتییەكی دیار و كاریگەری هەولێر و ناوچەكە بوو، لەژیانی خۆیدا وەك تێكۆشەرێكی گەورەی كوردایەتی و یەكێتیی نیشتمانیی كوردستان خزمەتێكی بەرچاوی بە گەلەكەمان كردووە، لە خەباتی شاخ وەك پێشمەرگە و لەشاریش رۆڵێكی گرنگی لە پرسە كۆمەڵایەتییەكان و چارەسەركردنی سەدان كێشەی كۆمەڵایەتی سنوورەكەدا هەبووە.


‎ محەمەد حەسەن پیرداود ناسراو بە مەلا محەمەد بەحركەیی لە 4-4-1939 لە گوندی بەحركە لەدایك بووە، لە ساڵی 1957 پەیوەندی بە رێكخستنەكانی پارتی دیموكراتی كوردستانەوە كردووە و بەشداری چەندین شەڕی كردووە، لە ساڵی 1978 پەیوەندی بە رێكخستنەكانی یەكێتیی نیشتمانیی كوردستانەوە كردووە و لە 11 ی ئازاری ساڵی 1991 دا بەشداری كاریگەری لە راپەڕینە مەزنەكەی شاری هەولێردا هەبووە، لە 7-7-1992 وەك كارگێڕی مەڵبەندی 3ی رێكخستنی هەولێر دەستبەكار بووە.

مامۆستا مەلا محەمەد بەحركەیی تا ساڵی 2020 وێڕای خانەنشینی و نەخۆشی، بەڵام كۆڵی نەداوە و  بەردەوامبووە لە خزمەت لە بواری سیاسی و كۆمەڵایەتی، بەداخەوە لە رۆژی 15-6-2020 بەهۆی نەخۆشییەوە بەیەكجاری ماڵئاوایی لە كەسوكار و كورد و یەكێتیی نیشتمانیی كوردستان كرد .

PUKMEDIA