قوباد تاڵەبانی: پڕۆژەكانی راپەرین تەواو بكرێن

نووسینگەی قوباد تاڵەبانی

كۆبووەوەی قوباد تاڵەبانی لەگەڵ سەرپەرشتیار و بەڕێوەبەرە گشتییەكانی راپەڕین

هاوشێوەی كۆبوونەوەكەی 9/4ی ساڵی رابردووی لەگەڵ بەڕێوەبەرایەتییەكانی پارێزگای سلێمانی، قوباد تاڵەبانی جێگری سەرۆك وەزیران لەگەڵ سەرپەرشتیار و بەڕێوەبەرە گشتییەكانی ئیدارەی راپەڕین كۆبووەوە و لە كۆبوونەوەكەدا گفتوگۆ لەبارەی پڕۆژەكانی وەبەرهێنان لە دەڤەرەكەدا كرا و بڕیاردرا لە ماوەیەكی نزیكدا و تا كۆبوونەوەی دووەم كێشە و گرفتی بەردەم سەرجەم پڕۆژەكانی ئیدارەی راپەڕین دیاریبكرێن كە داوای مۆڵەتیان كردووە و ئامادە بكرێن بۆ كەوتنە قۆناغی جێبەجێ كردنەوە.

لە كۆبوونەوەكەدا كە رۆژی 14ی حوزەیرانی 2023 لە ئەنجومەنی وەزیران بەڕێوەچوو، بە وردی قسە لەسەر گرفتەكانی بەردەم جێبەجێكردنی پڕۆژەكانی وەبەر‌هێنان و پڕۆژە خزمەتگوزارییەكانی ئیدارەی راپەڕین كرا، قوباد تاڵەبانی ئاماژەیدا بە گلەیی و ناڕەزایی وەبەرهێنەران و هاووڵاتیانی دەڤەرەكە لە سستی بەڕێوەچوونی كاروباری هاووڵاتییان و جێبەجێكردنی مامەڵەی یاسایی پڕۆژەكانی وەبەرهێنەران و رایگەیاند ئەم دۆخە قبوڵكراو نییە و دەبێت لە ئەمڕۆوە هەڵمەتێكی گەورەی جێبەجێكردنی پڕۆژەكانی وەبەرهێنان و خزمەتگوزاری لە دەڤەرەكە دەست پێ بكرێت.

لەم چوارچێوەیەدا جێگری سەرۆك وەزیران لیژنەیەكی تایبەتی دروست كرد بە نوێنەرایەتی ئۆفیسەكەی خۆی و بە هەماهەنگی لەگەڵ سەرپەرشتیاری ئیدارە و بەڕێوەبەرایەتییەكانی ئیدارەی راپەڕین كە ئەم لیژنەیە دەبێت تا كۆبوونەوەی دووەم كە لە ماوەیەكی نزیكی داهاتوودا دەكرێت، پۆلێنی هەموو ئەو پڕۆژانە تەواوبكرێت و ئامادەكاری بكرێت بۆ كەوتنە قۆناغی جێبەجێكردنەوە.

راشیگەیاند: "هەر بەرپرس و بەڕێوەبەرێك كێشە بۆ پڕۆژەكان دروست بكات یان كەمتەرخەم بێت لە جێبەجێكردنی كاروباری هاوڵاتییان، لێپرسینەوەی لەگەڵدا دەكرێت".

هەر لە كۆبوونەوەكەدا تاوتوێی چەند پڕۆژەیەكی خزمەتگوزاری لە دەڤەرەكەدا كرا و بڕیاردرا بە زوویی ئامادەكارییەكانی پڕۆژەكان تەواو بكرێن و بكەونە قۆناغی جێبەجێكردنەوە. 

لە بەشێكی دیكەی كۆبوونەوەكەدا قسە لەسەر كێشەكانی شارەوانی و تەرخان كردنی زەوی بۆ پڕۆژەكان كرا، لەمبارەیەشەوە جێگری سەرۆك وەزیران داوایكرد لە تەرخانكردنی زەویدا ئەولەوییەت بدرێت بە پڕۆژەكانی پیشەسازی و بازرگانی و ئەو پڕۆژانەی كە زۆرترین هەلی كار بۆ دانیشتوانی ئیدارەی راپەڕین دابین دەكات.

تەوەرێكی دیكەی كۆبوونەوەكە تەرخان كرا بۆ تاوتوێكردنی كێشەكانی دەروازی سنووری كێلێ و لەمبارەیەشەوە قوباد تاڵەبانی ئاماژەی كرد بە كۆبوونەوەی هەفتەی رابردووی لەگەڵ وەزیری ناوخۆی عیراق كە بڕیاریانداوە پێكەوە كار بكرێت بۆ پەرەپێدان و فراوانكردنی دەروازە سنورییەكە و چارەسەركردنی كێشەكانی ئەو دەروازەیە.

ئەم كۆبوونەوەیە هاوشێوەی كۆبوونەوەكەی ساڵی رابردوو بوو لەگەڵ بەڕێوەبەرایەتییەكانی پارێزگای سلێمانی كە لە دەرەنجامی كۆبوونەوەكەدا 39 پڕۆژەی گەورەی وەبەرهێنان بە سەرمایەی زیاتر لە ملیارێك و 300 ملیۆن دۆلار كەوتنە قۆناغی جێبەجێكردنەوە و ئامادەكاری تەواویش كرا بۆ جێبەجێكردنی 15 پڕۆژەی دیكەی وەبەرهێنان بە سەرمایەی زیاتر لە ملیارێك و 100 ملیۆن دۆلار كە بڕیارە لە ماوەیەكی نزیكدا جێبەجێ بكرێن.

PUKMEDIA