مەكتەبی راگەیاندن ئۆفیسی محاورون دەكاتەوە

محەمەد عومەر

کردنەوەی نووسینگەی محاورون من اجل القضية

مەكتەبی راگەیاندنی یەكێتیی نیشتمانیی كوردستان ئۆفیسی (محاورون من اجل القضية)ی كردەوە و بڕیاریشە لە هەولێر و كەركوك و بادینانیش ئۆفیسی محاورون بكرێتەوە.

بە ئامادەبوونی نوێنەری قوباد تاڵەبانی و لێپرسراوی مەکتەبی راگەیاندن، گروپی محاورون کرایەوە کە ئامانجی خستنەڕووی دید و بۆچوونی یەکێتیی نیشتمانیی کوردستانە لەبارەی پرسە هەنوکەییەکانەوە و رۆڵێکی گرنگ دەگێڕێت لەسەر ئاستی عیراق و میدیای عەرەبی.

ئەمڕۆ سێ شەممە ٦-٦-٢٠٢٣، لە چوارچێوەی چالاكییەكانی یادی 48 ساڵەی دامەزراندنی ی.ن.ك دا، لە رێورەسمێكدا بە ئامادەبوونی ستران عەبدوڵڵا لێپرسراوی مەكتەب و فریال عەبدوڵا ئەندامی سەركردایەتی و ژمارەیەك لێپرسراوانی كەناڵەكان و ئەندامانی مەكتەب و راگەیاندنكاران ئۆفیسی (محاورون من اجل القضية) كرایەوە.

ستران عەبدوڵڵا لێپرسراوی مەكتەبی راگەیاندن، لەوتەیەكی كورت دا باسی لە مێژووی راگەیاندنی یەكێتیی و قۆناغەكانی گەشەكردن و  كاریگەرییەكانی كرد و سوپاسی گرووپی محاورونی كرد كە دڵسۆزانە رۆڵیان هەبووە كە گەیاندن و روونكردنەوەی دیدگا و سیاسەتی یەكێتیی بە شەقامی سیاسیی عیراقی  و رایگەیاند: "بۆ گەشەپێدانی محاورون، ئۆفیسەكانی هەولێر و كەركوك و دهۆكیش دەكەینەوە".

هەروەها تەواوی پشتیوانی مەكتەبی راگەیاندنی دووپاتكردەوە بۆ سەرخستن و پەرەپێدانی زیاتر و دواتریش بوانامەی رێزلێنان بە ئەندامانی و پشتیوانانی محاورون بەخشرا، كە لە ناویاندا PUKMEDIA سایتی رەسمی یەكێتیی نیشتمانیی كوردستان بڕوانامەی رێزلێنانی پێبەخشرا.

هەر لەوبارەیەوە بورهان شێخ رەئوف ئەندامی گروپی محاورون رایگەیاند: "گروپی محاورون لەسەر پێشنیاری ستران عەبدوڵڵا لێپرسراوی مەکتەبی راگەیاندنی یەکێتیی نیشتمانیی کوردستان ساڵێک زیاترە دامەزرێنراوە، بەڵام ئەمڕۆ بە رەسمی نووسینگەی بۆدەکرێتەوە و ئەم گروپە لە ماوەی رابردوودا رۆڵێکی گرنگی لەسەر ئاستی عیراق و میدیای عەرەبی بینیوە".

"زیاد لە ١١٠ کەناڵ لە بەغدا هەیە و پێویستییان بە دید و بۆچوونی یەکێتیی نیشتمانیی کوردستان هەیە لەسەر هەموو ئەو پرسانەی لە عیراق دا دێنە پێشەوە"، بورهان شێخ رەئوف وادەڵێت.

ئەوەشی خستەڕوو: "زۆرجار وەک کادرانی یەکێتی چاوپێکەوتنمان ئەنجامداوە و بەرگریمان لە سیاسەت و بۆچوونی یەکێتیی نیشتمانیی کوردستان کردووە، جێی دەستخۆشییە لەئێستادا گروپی محاورون بە گڕوتینێکی نوێوە پەرە بە دید و بۆچوونی یەکێتی دەدات".

گروپی محاورون لە ٢٣ ئەندام پێکدێن، کە کۆمەڵێک نووسەر و رەوانبێژی سیاسی و کادری پێشکەوتوی یەکێتیی نیشتمانیی کوردستانن، بە زمانی عەرەبی هەڵسەنگاندنی زانستییانە بۆ پرسەکان دەکەن و سیاسەتی یەکێتی بە روونتر دەگەیەنن بە هەموو لایەک.
PUKMEDIA