100 پەرلەمانتاری عیراق ئیمزا بۆ پەسەندکردنی بوودجە کۆدەکەنەوە

PUKMEDIA

ئەنجومەنی نوێنەران

نوێنەرانی کورد و ژمارەیەک لە نوێنەرە عەرەبەکانی ئەنجومەنی نوێنەرانی عیراق ئیمزا کۆدەکەنەوە بۆ فشار خستنە سەر پەرلەمان بۆ دەنگدان لەسەر پەسەندکردنی بوودجە.

کاروان یاروەیس ئەندامی ئەنجومەنی نوێنەرانی عیراق لە فراکسیۆنی یەکێتی بە سایتی رەسمی یەکێتیی نیشتمانیی کوردستان PUKMEDIA ی راگەیاند: "پاڵپشتی خۆمان دەربڕی و ناومان خستەسەر یاداشتی  هەڵمەتی کۆکردنەوەی ئیمزا بۆ فشارخستنە سەر سەرۆکایەتی ئەنجومەنی نوێنەرانی عیراق، هەتا لەم هەفتەیەدا وادەی دانیشتنی پەرلەمان بۆ دەنگدان لەسەر پەسەندکردنی پرۆژە یاسای بودجەی گشتی عێراق دیاری بکات".

دەشڵێت: "دواکەوتنی پەسەندکردنی بودجە جگە لەوەی سەرپێچی پەیرەوی ناوخۆی پەرلەمانە، لەهەمان کاتدا کاریگەری خراپی کردۆتەسەر ژیانی خەڵک و بازاڕ و پرۆژە خزمەتگوزارییەکان".

هاوکات د.نەرمین مەعروف ئەندامی لیژنەی دارایی لە ئەنجومەنی نوێنەرانی عیراق لەفراكسیۆنی یەكێتی بە سایتی رەسمیی یەكێتیی نیشتمانیی كوردستان PUKMEDIA ی راگەیاند:"بەهۆی ئەوەی پرسی بودجە پرسێکی گشتییە زۆرینەی پەرلەمانتاران لەگەڵ ئەو پرۆژەیەن و بۆ ئەم هەڵمەتەش نزیکەی 100 ئیمزای نوێنەران کۆکراوەتەوە، لەکاتێکدا بۆ پێشنیاری هەر بابەتێک پێویستمان بە 50 ئیمزا هەیە".

PUKMEDIA