دوو پەرلەمانتاری یەکێتی رێژه‌ی وه‌رگرتنی گه‌نمی جوتیاران له‌عیراق زیاد ده‌كه‌ن

PUKMEDIA

گه‌نمی جوتیاران

دوو پەرلەمانتاری یەکێتی توانییان بڕی وەرگرتنی گەنمی جوتیارانی هەرێم لەلایەن عیراقەوە زیاد بکەن، ئەمە جگە لەوەی لەلایەن عیراقەوە رێگەیان بۆ جوتیارانی هەرێم کردەوە کە بەرهەمە کشتوکاڵییەکانیان بۆ شارەکانی ناوەڕاست و خواروی عیراق بنێرن.

د. بڕیار رەشید ئەندامی ئەنجومەنی نوێنەرانی عیراق لە فراکسیۆنی یەکێتی بە سایتی رەسمی یەکێتیی نیشتمانیی کوردستان PUKMEDIA ی راگەیاند: "دوای ئەوەی لە ماوە رابردوو لە پەیوەندی بەردەوامدا بووین لەگەڵ وەزارەتی بازرگانی عیراق  و وەزارەتی کشتوکـاڵی عیراق و کوردستان لەسەر زیادکردنی بڕی وەرگرتنی گەنم لە جوتیارانی هەرێم، توانرا بڕەکـە لە ۳۷٥ هەزار تۆنەوە بۆ ٥۰۰ هەزار تۆن زیاد بکـرێت".

"هەروەها بڕیاردرا بە رێگەکردنەوە بۆ جوتیارانی هەرێم کە بەرهەمە کشتوکاڵییەکانیان بەرەو ناوەراست و خوارووی عیراق بڕوات، ئەمەش دەبێتە هۆی ساغکردنەوەی بەرهەمی جوتیاران و دەستکەوتی ماددی بۆ جوتیارانی هەرێم"، د. بڕیار رەشید وای وت.

ئەمەش لە کاتێکدایە کە ئەمڕۆ هەردوو پەرلەمانتاری فراکسیۆنی یەکێتی د. بڕیار رەشید و غەریب ئەحمەد سەردانی وەزارەتی کشتوکاڵی عیراقیان کردوەو لەگەڵ وەزیر کۆبونەوە، بەمەبەستی زیادکردنی بڕی وەرگرتنی گەنم لە جوتیارانی هەرێم.

PUKMEDIA