قوباد تاڵەبانی بۆ كوردە ئازاكەی بەریتانیا: شانازیت پێوەدەكەین

PUKMEDIA

قوباد تاڵەبانی و سەروەر مەحمود

قوباد تاڵەبانی جێگری سەرۆك وەزیرانی هەرێمی كوردستان ستایشی هەڵوێستە ئازایانەكەی سەروەر مەحمودی كرد كە هەفتەی رابردوو لە رووداوێكی ئاگركەوتنەوەدا توانی ژیانی 30 كەس رزگار بكات.

سەروەر مەحمود رایگەیاند: "رۆژی چوارشەمە 24ی ئایار قوباد تاڵەبانی لەڕێگەی تەلەفونەوە پەیوەندیی پێوەكردووە و دەستخۆشی لێكردووە كە بەهۆی هەڵوێستە ئازایانەكەیەوە توانیویەتی ژیانی 30 كەس لە مردن رزگار بكات و پێی وتووە كە وەك كوردێك شانازیت پێوە دەكەین".

سەروەر مەحمود وتیشی: "زۆر دڵخۆش بووە كە جێگری سەرۆك وەزیرانی هەرێم پەیوەندیی پێوەكردووە و دەستخۆشی لێ كردووە، ئەم جۆرە هەڵوێستانە هاندەرێكە بۆ هەموو ئەو كوردانەی لە دەرەوەی وڵات بە شێوازی جۆراوجۆر ناو و ناوبانگی كورد بە جوانی نیشانی وڵاتانی دیكە دەدەن" .

سەروەر مەحمود تەمەنی 39 ساڵە و هاووڵاتییەكی بەریتانیایە و خەڵكی شاری كەلارە، رۆژی چوار شەممەی هەفتەی رابردوودا كاتێك دەبینێت باڵەخانەیەك بەهۆی شۆرتی كارەباوە ئاگری گرتووە، بە هانای ئەو خەڵكەوە دەچێت كە لە ئاگرەكەدا گیریان كردووە و تا ئەو كاتەی تیمەكانی فریاكەوتن دەگەنە شوێنی رووداوە توانی ژیانی 30 كەس لە دانیشتوانی ناو باڵەخانەكە رزگار بكات، بەهۆی ئەم هەڵوێستەیەوە لە میدیاكانی بەریتانیا بە كوڕە ئازاكە ناسراوە و لە ئاستێكی بەربڵاو ستایشی  هەڵوێستەكەی دەكرێت.

کوردێک لە بەریتانیا 30 کەس لە مردن رزگار دەکات

PUKMEDIA