دادوەرێكی كورد دەبێتە سەرۆكی ئەنجومەنی كۆمسیاران

راگەیاندنی كۆمسیۆنی باڵا

ئەنجومەنی كۆمسیاران

كوردێك دەبێتە سەرۆكی ئەنجومەنی كۆمسیارانی كۆمسیۆنی باڵای سەربەخۆی هەڵبژاردنەكانی عیراق.

ئەمڕۆ لە كۆبوونەوەی ئەنجومەنی كۆمسیارانی كۆمسیۆنی باڵای سەربەخۆی هەڵبژاردنەكانی عیراقدا، بەكۆی دەنگی ئەندامانی ئامادەبووی ئەنجومەنەكە، دادوەر عومەر ئەحمەد محەمەد وەك سەرۆكی ئەنجومەن كە كوردە هەڵبژێردرا و پاشانیش دادوەر فەیاز یاسین حسێن وەك جێگری سەرۆكی ئەنجومەنەكە دەستنیشان كرا.

پاش ئەوەی ماوەیەكە دادوەر جەلیل عەدنان خەڵەف دەستی لە پۆستی سەرۆكی ئەنجومەنەكە كێشاوەتەوە و دادوەر عومەر ئەحمەد محەمەد كە جێگری بووە كارەكانی بەڕێكردووە ئەمڕۆش بۆ پڕكردنەوەی ئەو پۆستە لە هەڵبژاردنێكی دیموكراسیدا كرایە سەرۆكی ئەنجومەنەكە.

ئەنجومەنی كۆمسیارانی كۆمسیۆنی باڵای سەربەخۆی هەڵبژاردنەكانی عیراق لە نۆ ئەندام پێكدێت كە لەو ژمارەیە دووانیان كوردن و لەسەر پشكی هەرێمی كوردستانن و لەلایەن ئەنجومەنی باڵای دادوەرییەوە دەستنیشان دەكرێن و بۆ ماوەی چوار ساڵ دەتوانن لەپۆستەكەیاندا بمێننەوە بەبێ دریژكردنەوە.

 
PUKMEDIA