تیمی وه‌زاری یه‌كێتی به‌شداری كۆبوونه‌وه‌ی ئه‌نجومه‌نی وه‌زیران ده‌كات

PUKMEDIA

تیمی وه‌زاری یه‌كێتی

ئه‌نجومه‌نی وه‌زیرانی ھه‌رێم كۆده‌بێته‌وه‌ و تیمی وه‌زاری یه‌كێتیش به‌شداریی كۆبوونه‌وه‌كه‌ ده‌كات.

سه‌میر ھه‌ورامی وته‌بێژی قوباد تاڵەبانی جێگری سه‌رۆك وه‌زیرانی ھه‌رێمی كوردستان به‌ PUKMEDIA راگه‌یاند:"ئه‌مڕ‌ۆ ئه‌نجومه‌نی وه‌زیرانی ھه‌رێم كۆده‌بێته‌وه‌و تیمی وه‌زاری یه‌كێتیش به‌سه‌رۆكایه‌تی (قوباد تاڵه‌بانی) به‌شداریی كۆبوونه‌وه‌كه‌ ده‌كات".

رۆژی دوو شه‌ممه‌ی رابردوو قوباد تاڵه‌بانی جێگری سه‌رۆك وه‌زیرانی ھه‌رێم و مه‌سرور بارزانی سه‌رۆك وه‌زیرانی ھه‌رێمی كوردستان كۆبوونه‌وه‌، بۆ چاره‌سه‌ركردنی كێشه‌كان به‌ ڕ‌ێگه‌ی گفتوگۆ.

له‌ كۆبوونه‌وه‌كه‌دا جه‌خت له‌سه‌ر پاراستنی ته‌بایی و یه‌كڕ‌یزیی ناوخۆیی كرایه‌وه‌، له‌پێناو پاراستنی به‌رژه‌وه‌ندییه‌ نیشتمانی و مافه‌ ده‌ستوورییه‌كانی ھاووڵاتیانی ھه‌رێم.

هاوکات حکومەتی هەرێمی کوردستان لەراگەیەندراوێکدا ئاماژەی بەناوەڕۆکی کۆبوونەوەکە کردووە و رایگەیاندووە:"لە کۆبوونەوەکەدا، چەند تەوەرێک تاووتوێ دەکرێن، تەوەری یەکەم تایبەت دەبێت بە خستەڕووی دوا پێشهاتەکانی دەستپێکردنەوەی هەناردەکردنی نەوتی هەرێمی کوردستان، لە چوارچێوەی ڕێککەوتنی نێوان حکومەتی هەرێمی کوردستان و حکومەتی فیدراڵی، لە تەوەری دووەمی کۆبوونەوەکەدا، بابەتی ڕێکخستنەوەی داراییی گشتی لە هەرێمی کوردستان باسی لێوە دەکرێت.

خستنەڕووی ڕاپۆرتی وەزارەتی ناوخۆ سەبارەت بە هەڵسەنگاندنی نیشتمانی لەلایەن حکومەتی فیدراڵییەوە بۆ مەترسییەکانی شووشتنەوەی مایە و مایەدارکردنی تیرۆر لە عێراق، تەوەری سێیەمی کۆبوونەوەکەیە.

PUKMEDIA