نوێنەری یەكێتی بەشداری كۆنگرەی پارتی دیموكراتی هۆڵەندی دەكات

PUKMEDIA

بەختیار بەكر نوێنەری یەكێتی لە هۆڵەندا

بەختیار بەكر نوێنەری یەكێتیی نیشتیمانیی كوردستان لە هۆڵی كۆنگریسی ڕای لە شاری ئەمستەردامی هۆڵەندا، بەشداری كۆنگرەی پارتی دیموكراتی هۆڵەندای كرد و وەكو قسەكەر لەیەكێك لە بەرنامە پۆلێنكراوەكانی تایبەت بە ناوچەكە بەشدار بوو.

بەختیار بەكر نوێنەری یەكێتی لە لێدوانێكیدا بۆ سایتی رەسمی یەكێتیی نیشتیمانیی كوردستان PUKMEDIA رایگەیاند: "پارتی دیموكراتی هۆڵەندی وەكو یەكێك لە چوار پارتە سەرەكییەی نێو دەسەڵات لەحكومەتی ئێستای هۆڵەندا، ئەمڕۆ 117هەمین كۆنگرەی خۆی بەست و پێداچوونەوەی بە بەرنامەی كاری رێكخراوەیی كرد و هەڵسەنگاندنیشی بۆ ئەنجامە نەخوازراوەكانی دواین هەڵبژاردنە لۆكاڵییەكان كرد، كە تیایدا پارتە رەسەنەكان بەگشتی ژمارەی دەنگەكانییان دابەزینیان بەخۆیەوە بینی".

نوێنەرەكەی یەكێتی راشیگەیاند: "پەیوەندی ئێمە وەكو یەكێتیی نیشتمانیی كوردستان لەگەڵ زۆربەی هەرە زۆری پارت و رێكخراوەكانی هۆڵەندا لەئاستێكی زۆر باشدایە و لەگەڵ پارتی دیموكراتی هۆڵەندیش بەهەمان شێوە و دۆستایەتیمان لەسەر بنەمای ئامانجە هاوبەشەكانە و هەردوولامان بەگرنگییەوە لە بوونی پەیوەندی ئۆرگانیكی دەڕوانین".

جێی ئاماژەیە هەر لەكۆنگرەكەدا نوێنەری یەكێتی لەهۆڵەندا بەجیا لەگەڵ خاتوو بۆس، لێپرسراوی مەكتەبی كاروباری دەرەوە و  شوورد شوردسما  ئەندامی پەرلەمان و لێپرسراو و قسەكەری فڕاكسیۆنی پارتەكە بۆ كاروباری نێودەوڵەتی بەگشتی و رۆژهەڵاتی ناوەڕاست بەدیاریكراوی، كۆبووەوە و باسی پەیوەندی دووقۆڵی و گۆڕانكاری و پێشهاتە سیاسییەكانیان كرد.

پارتی دیموكراتی هۆڵەندا پارتێكی پڕۆ ئەوروپایین و سۆشیال لیبڕاڵن، بەدەر لە فڕاكسیۆنێكی كارا و كاریگەر لە پەرلەمان، لە حكومەت، چەندین وەزارەتی گرنگ و پۆستی جێگری یەكەمی سەرۆك وەزیرانیان بەدەستەوەیە. 

PUKMEDIA