د. مەحمود مەشهەدانی: پێگەی سەرۆك مام جەلال پڕناكرێتەوە

PUKMEDIA

سەردانی وەفدەكەی ئەنجومەنی نوێنەرانی عیراق بۆسەر مەزاری سەرۆك مام جەلال

وەفدێكی ئەنجومەنی نوێنەران بۆ دووپاتكردنەوەی بەڵێن و بەردەوام بوون لەسەر رێبازە ئاشتیخوازانەكەی سەرۆك مام جەلال، سەردانی مەزارەكەیان كرد و د. مەحمود مەشهەدانی سەرۆكی وەفدەكەش رایگەیاند: " سەرۆك مام جەلال قوربانی زۆری بۆ عیراق داوە".

ئەمڕۆ وەفدێكی باڵای ئەنجومەنی نوێنەرانی عیراق سەردانی مەزاری سەرۆك مام جەلالی كرد و تاجەگوڵینەی رێز و وەفای لەسەر مەزارەكەی دانا، د. مەحمود مەشهەدانی سەرۆكی پێشووی ئەنجومەنی نوێنەرانی عیراق و سەرۆكی لیژنەكە رایگەیاند: "سەرۆك مام جەلال قوربانی زۆری بۆ عیراق داوە و هیچ كەسێك ناتوانێت شوێن و پێگەی پڕبكاتەوە".

هاوكات مامۆستا غەریب ئەحمەد ئەندامی وەفدەكەی ئەنجومەنی نوێنەرانی عیراق رایگەیاند: "سەرۆك مام جەلال تەنها لای كورد مەرجەع نییە، بەڵكو لای عیراقییەكانیش مەرجەعە و یادكردنەوەی جێی بایەخە، هەروەك عەلی سیستانی مەرجەعی باڵای شیعەی عیراق دەیوت مام جەلال سەمامی ئەمانە، بۆیە ئەمڕۆ سەردانی مەزارەكەیمان كرد و بەڵینمان بۆ دوووپات كردەوە كە بەردەوام دەبین لەسەر رێبازە ئاشتیخوازانەكەی و وتە بەناوبانگەكەی كە دەیوت عیراق بۆ هەمووانە".

راشیگەیاند: "هەر ئەمڕۆ وەفدەكە لەگەڵ قوباد تاڵەبانی جێگری سەرۆكی حكومەتی هەرێم كۆدەبینەوە و گفتوگۆی چارەسەركردنی كێشەكانی نێوان هەرێم و عیراق دەكەین و سوود لە ئەزمونەكانی لەو بوارەدا وەردەگرین، چونكە لای شەقامی سیاسی عیراق روونە كە قوباد تاڵەبانی هەوڵی زۆری بۆ چارەسەركردنی كێشەكانی نێوان هەرێم و عیراق داوە و سەردانە بەردەوامەكانی بۆ بەغدا باشترین بەڵگەن، بۆیە ئەم كۆبوونەوەیە لای وەفدی ئەنجومەنی نوێنەران قورسایی و گرنگی خۆی هەیە".

"یەكێتیی نیشتمانیی كوردستان هەوڵی زۆری بۆ یەكڕیزی گەلی عیراق داوە و پێداگری ئەو حزبە و سەرۆك بافڵ جەلال تاڵەبانیش لەو پێناوەدا عیراقی لە لێواری داڕمان پاراست" مامۆستا غەریب ئەحمەد وایوت.

هاوكات دوێنێ 12-5-2023 عەممار حەكیم سەرۆكی رەوتی حیكمەی نیشتمانی، سەردانی مەزاری سەرۆك مام جەلالی كرد و تاجە گوڵینەی رێز و وەفای لەسەر مەزارەكە دانا و رایگەیاند، "سەرۆك مام جەلال پیاوی چارەسەرە گەورەكان بوو لە رۆژگاری قەیران و ئەو ئاستەنگانەی كە رووبەڕووی گەلەكەمان و پڕۆسەی سیاسی دەبوونەوە، هەروەها خەباتی زۆری كرد دژی دیكتاتۆرییەت".

PUKMEDIA