سەرۆک بافڵ: ئامانجمان بونیادنانی داهاتوویەکی گەشترە

نوسینگەی رۆژنامەوانی سەرۆکی یەکێتی

پێشوازی سەرۆک بافڵ لە سەید عەممار حەکیم

بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازیکرد لە سەید عەمار حەکیم، سەرۆکی رەوتی حیکمەی نیشتمانی.

لەدیدارێکدا کە رەفعەت عەبدوڵا، بڕیاردەری دەستەی کارگێڕی و شاڵاو عەلی عەسکەری و دەرباز کۆسرەت رەسوڵ، کارگێڕانی مەکتەبی سیاسی و قوباد تاڵەبانی، سەرپەرشتیاری مەکتەبی سکرتاریەتی سەرۆک مام جەلال و سالار سەرحەد، لێپرسراوی بۆردی پەیوەندییە کوردستانییەکان ئامادەبوون، دوایین گۆڕانکارییە سیاسییەکان تاوتوێکران و جەخت لە بەردەوامی دیالۆگی نیشتمانی و هەنگاوی بونیادنەرانە کرایەوە لەپێناو پاراستنی سەقامگیری لە وڵات و سەرخستنی بەرنامەی چاکسازیی حکومەت.

لە درێژەی دیدارەکەدا سەرۆک بافڵ جەلال تاڵەبانی سوپاس و پێزانینی ئاڕاستەی سەید عەمار حەکیم کرد لە بەرامبەر خەمخۆری و پەرۆشی بۆ تەندروستیی سەرۆک بافڵ و راشیگەیاند، هەوڵەکانمان بۆ چارەسەرکردنی کێشەکانی نێوان هەرێم و بەغدا و پێشکەشکردنی خزمەتگوزاری زیاتر بۆ هاوڵاتییان بەردەوام دەبێت و ئامانجمان بونیادنانی داهاتوویەکی گەشتر و سەقامگیرترە بۆ خەڵکەکەمان.

PUKMEDIA