تیمی یەکێتی و گۆڕان: پەیوەندی حزبی و حکومی هەردوولا پتەوتر بکرێت

PUKMEDIA

کۆبوونەوەی تیمی یەکێتی و گۆڕان لە حکومەتی خۆجێیی سلێمانی

تیمی هاوبەشی یەکێتیی نیشتمانیی کوردستان و بزوتنەوەی گۆڕان لە حکومەتی خۆجێیی سلێمانی راگەیەندراوێکیان بڵاوکردەوە و تێیدا تەئکیدیان لە پێویستی پتەوکردنی پەیوەندییەکانی نێوان یەکێتی و گۆڕان لە حکومەت وحزبیش کردەوە تاوەکو بتوانرێت رووبەڕووی ئاڵنگارییەکان ببنەوە.

لەو راگەیەندراوە هاوبەشەدا کە وێنەیەکی بۆ سایتی رەسمی یەکێتیی نیشتمانیی کوردستان PUKMEDIA نێردراوە یەکێتی و گۆڕان باسیان لە دارشتنی سیاسەتی کاری هاوبەش و ئامادەکارییەکان بۆ قۆناغەکانی داهاتوو کردووە.

دەقی راگەیەندراوەکە

راگەیەندراوی تیمی هاوبەشی یەکێتیی نیشتمانیی کوردستان وبزوتنەوەی گۆڕان لە حکومەتی خۆجێی سلێمانی

تیمی هاوبەشی بزوتنەوەی گۆڕان و یەکێتیی نیشتمانیی کوردستان لە حکومەتی خۆجێی سلێمانی کۆبوونەوە و پێکەوە گفتوگۆیان لەبارەی دواپێشهات و گۆڕانکاری و ئامادەکارییەکان بۆ قۆناغەکانی داهاتوو و رێکخستنەوەی باشتری پەیوەندییەکان کرد.

لە کۆبوونەوەکەدا کە ئەمڕۆ ٩ی ئایار لە سلێمانی بە سەرپەرشتی بەڕێزان، مستەفای سەید قادر جێگری سەرۆکی هەرێم و قوباد تاڵەبانی جێگری سەرۆک وەزیران بەڕێوەچوو، قسە لەبارەی چۆنییەتی رێکخستنەوەی پەیوەندییەکان لە سەر ئاستی پارێزگای سلێمانی بەتایبەت و هەرێمی کوردستان بەگشتی کرا. هەروەها هەڵسەنگاندن بۆ دۆخی هەنووکەیی کراو لەو بارەیەشەوە باسیان لە دارشتنی سیاسەتی کاری هاوبەش و ئامادەکارییەکان بۆ قۆناغەکانی داهاتوو کرد.

کۆبوونەوەکە لەبەر رۆشنایی گۆڕانکاری و دواپێشهاتە سیاسی و ئابوورییەکان، جەختی لەوە کردەوە کە پێویستە پەیوەندییەکانی نێوان یەکێتی و گۆڕان لە حکومەت وحیزبیش پتەوتر بکرێن بۆ ئەوەی لە ئاستی چاوەڕوانی خەڵکدا بێت و بتوانرێت رووبەڕووی ئاڵنگارییەکان ببن  و داکۆکی لە داوا ڕەواکانی و پێویستییەکانی سلێمانی بکەن.