بە یادی خۆپیشاندانی رۆژگاری بێ خۆپیشاندانی لە کەرکوک

PUKMEDIA

ستران عەبدوڵڵا

نووسینی... ستران عەبدوڵڵا

بەسەر دەفتەری یادەوەری شاردا شۆڕ ببەوە و بزانە ئەم حەرف و تۆمارە چی دەگێڕێتەوە و چی ناگێڕنەوە؟
لە ناو جەرگەی بەعس و تەعریب و عەسكەردا دەیان لاوی كورد دەڵێن ئێمەش دەتوانین خۆپیشاندان بكەین، چونكە كەركوكیش كوردستانە و ئەم شارە بۆ ئەوە تایبەت نییە لەسەر ڕەف دابنرێت تا هەموو كوردستان ڕزگار بێ و كەركوكیش خەڵاتی ڕزگارییەكەی بێت. ئەم شارە بۆ چەماندنەوەی ئیرادەی مەحاڵ و ئەستەم هاتووە.
ئەلبومی بەتاڵی وێنەی ڕوداوەكە و دەفتەری وێنەی تەڵخی شەهیدەكانی دەڵێ و نوتقی هەیە:
لە قەڵادزێ تا سلێمانی، لە هەڵەبجە تا پێنجوێن و هەولێر خۆپیشاندان لەسەر خەتە كە شۆڕش لە شاخەوە بێننە ناو شار و بە بەعس بڵێن ماسییەكە بێ ئاو نییە و نەتەوەی كوردیش بێ خاوەن نییە.
كەس باوەڕی نەبوو كەركوك (نەخێر)ی وا گەورە بڵێت لە جوگرافیایەكی دژواری تەعریب و تەبعیسدا، بەڵام ئەمەش بوە و دەبێ.
میللەتی دەستپێشخەری، لە شاری دەستپێشخەریدا، ڕێكخستنی دەستپێشخەری هەیە كە قسەی هەق دەخاتە مشتی ئاسنینی بەعسەوە.
بەعس با بزانێ، وەكو دەشیزانی، خۆپیشاندان بۆ هەق و دادپەروەری كات و ساتی نییە و گوێ لە چاولێكەری و هەل و مەرجی عەینی و مەوزوعی ناگرێ. تینی نەخێر بانگەوازەو دێ و نەعرەتی كوردانەیە، لە جەیش و جاش و بەعس و لە ئەمنی عەرەب و تۆران ناسلەمێتەوە.
وەختێ كورد لە كەركوك ڕاپەڕی و خۆپیشاندانی كرد لە هیچ شوێنكی دونیادا ساتی شۆڕش و ڕاپەڕین و خۆپیشاندان نەبوو ، سەیری تەقویم بكەن لە شەرق تا غەرب، لە ئەمریكای لاتین، تا سۆڤێت و چین، لە بەلەكجاڕ تا لاچین، هیچ قسە و باسێك لەسەر دەستپێشخەری نییە. بەس لاوی كەركوك و لاوی ڕێكخستنی یەكێتی هەیە و هەیەتی.
یانزە شەهید مۆری سەروەری حۆپیشاندانی لە تەئریخ دا. نە سەتەلایت وەك ئەمڕۆ، روداو تۆماردەكا، و نە سۆشیال میدیا چاولێكەری و چاوداگری لەگەڵ دونیای بێ ڕەحم و دوو ڕوو دەكات.
سەیری ئەو دڵڕەقییە لە كۆتایی دوو دەیەی سەدەی بیستدا شارێك خەڵتانی خوێن دەبێ كەس ڕەنگ و دەنگی لا نییە و تۆماری بۆ دوا ڕۆژ نییە. وێنەیەك نییە بۆ پۆستەر و شیعرێك نییە بۆ نۆتە و ئاوازی نەمری.
تاریخی دڵڕەق وێنەی كوشتاری ئەرمەن و فەڵەستین و دوو جەنگی جیهانی بە وردەكارییەوە هەیە. كەچی تۆماری لەم سەروەرییەی كەركوكی هەڵنەگرتووە.
بەشانازییەوە كەركوك ئەوەی كرد كە نازدار و خواپێداوەكانی ڕۆژهەڵات و ڕۆژئاوا نەیان كردووە. دروشمێك چل ساڵ پێش بەهاری عەرەبی وتی:
سوپا سوپای گەلە و هی دیكتاتۆرەكان نییە. پێش چل و یەك ساڵ كەركوك وتی: سوپای گەل سوپای خەڵكە و هەر بەعسی فاشی بێ كەڵكە.