لەهەولێر ساڵیادی تیرۆرکردنی سەردەشت عوسمان دەکرێتەوە

ئاژانسەکان

بنەماڵەی سەردەشت عوسمان

ئەمڕۆ٥-٥-٢٠٢٣  لەشاری هەولێر لەمەراسیمێکدا ساڵیادی شەهیدبوونی، سەردەشت عوسمان شەهیدی قەڵەم بەرزڕاگیرا، دواتر وتاری خانەوادەی سەردەشت عوسمان لەسەر گۆری کوڕەکەیان دوای ١٣ساڵ لەشەھید کردنی خوێندرایەوە و دەڵێن:" تائێستا دەسەڵات سناریۆی قێزەون وناشیرین لەسەر دۆسیەی سەردەشت عوسمان دروست دەکەن"


لەوتارێکدا بنەماڵەی شەهید سەردەشت عوسمان رایانگەیاند:" بۆ دەیان جار دەیڵێینەوە لای ئێمە سەردەشت هێشتا خوێنەکەی تەڕە و پەیامەکەی لەهەڕەتی لاوێتی خۆیدایە و بەسەرنەچووە".


وتیشیان:" تائێستا دەسەڵات سناریۆی قێزەون وناشیرین لەسەر دۆسیەی سەردەشت عوسمان دروست دەکەن، کەیسی سەردەشت و تەواوی شەهیدانی قەڵەم و ئازادی پێش و پاش سەردەشتیش کەیسێکی هەمیشە کراوەیە و لای ئێمە دانەخراوە، شەهید سەردەشت وەک سەرقافڵەی گەنجە خێرلەخۆنەدیوەکان و قەڵەم و ئازادی پەیامەکەی گەیاندە جێی مەبەست و دەمامکی لەڕووی دەسەڵاتداران هەڵماڵی".


بنەماڵەی سەردەشت عوسمان ئاماژەیان بەوەشکرد:"ناڕێکی و ناهەومواری حوکمی دەسەڵاتدارانی هەرێم لەڕێی هاوپەیامەکانت جیهانی تەنیوەو ئیتر ساڵ و مانگێک نییە رێکخراوە جیهانییە بێلایەنەکانی رۆژنامەوانی و دادپەروەری و داکۆکیکارانی مافی مرۆڤ لەبری تۆ و خوێندکارە تەنگ پێهەڵپێچراو زیندانییەکانت بە راپۆرتەکانیان هەقیقەتی ئەم دەسەڵاتە کوردییە کورد کوژە دژی ئازادییە شەرمەزار دەکەن".


13 ساڵ به‌سه‌ر رفاندنی سه‌رده‌شت عوسمان رۆژنامه‌نوس و خوێندكاری به‌شی زمانی ئینگلیزی كۆلێجی ئادابی زانكۆی سه‌ڵاحه‌دین تێده‌په‌ڕ‌ێت، كه‌ له‌هه‌ولێر له‌به‌رده‌م زانكۆی سه‌ڵاحه‌دین له‌لایه‌ن كه‌سانی نه‌ناسراوه‌وه‌ رفێنراو دوای دوو رۆژ ته‌رمه‌كه‌ی به‌ قۆڵبه‌ستكراوی و تیرۆر كراوی له‌ ده‌وروبه‌ری موسڵ دۆزرایه‌وه‌، هه‌تا ئه‌مڕ‌ۆش بكوژان و ئه‌نجامده‌رانی ئه‌و تاوانه‌ ده‌ستگیرنه‌كراون و به‌ ئازادی ده‌سوڕ‌ێنه‌وه‌.


هاوکات پێشتر به‌شدار عوسمان برای شه‌هیدی قه‌ڵه‌م سه‌رده‌شت عوسمان له‌ساڵیادی تیرۆركردنی براكه‌ی به‌سایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند:" ئه‌گه‌ر چی كه‌یسی تیرۆركردنی سه‌رده‌شت عوسمان لای حكومه‌ت داخراوه‌و هه‌ر باسیشی لێوه‌ناكرێت، به‌ڵام لای ئێمه‌و رۆژنامه‌نوسان و ئازادی خوازان دانه‌خراوه‌و به‌زیندووی ماوه‌ته‌وه‌، له‌كاتێكدا تاوانبارانی تیرۆری براكه‌م دادگایی نه‌كراون و ده‌سه‌ڵاتی قه‌زای و ده‌زگای ئه‌منی له‌و تاوانه‌دا به‌كارهێنراون".

"به‌ڵگه‌ی زۆر له‌به‌رده‌ستدا هه‌بوو كه‌ ده‌توانرا بكوژانی سه‌رده‌شت ده‌ستگیربكرێن، به‌ڵام له‌لایه‌ن كاربه‌ده‌ستانی باڵای حكومه‌ته‌وه‌ په‌رده‌پۆشكراو دۆسیه‌كه‌ لای ئه‌وان داخرا" به‌شدار عوسمان وایوت.

PUKMEDIA