فراکسیۆنی یەکێتی داوای بودجەیەکی تایبەت بۆ هەڵەبجە دەکات

PUKMEDIA

پارێزگای هەڵەبجە

فراکسیۆنی یەکێتیی سوپاس و دەستخۆشی لەهەموو ئەو لایەن و فراکسیۆنانە دەکات، کە لەبارەی بەپاریزگابوونی هەڵەبجەوە هاوڕایان بوون، بڕیاردەری فراکسیۆنەکەش دەڵێت:" داوامانکردووە بوودجەیەکی تایبەت بۆ ئاوەدانکردنەوەی هەڵەبجە تەرخانبکرێت".

کاروان یاروەیس بڕیاردەری فراکسیۆنی یەکێتی لە ئەنجومەنی نوێنەرانی عیراق بەسایتی رەسمیی یەکێتیی نیشتمانیی کوردستان PUKMEDIA ی راگەیاند:" خوێندنەوەی دووەم بۆ پرۆژە یاسای بەپارێزگابوونی هەڵەبجە کرا و هەوڵەکان بۆ ئەوەیە پێش پەسەندکردنی پرۆژە یاسای بوودجە بەپارێزگا بوونی هەڵەبجە دەنگی لەسەر بدرێت و رێککارە یاساییەکانی تەواوبکرێت".

"وەک فراکسیۆنی یەکێتیی لەکۆبوونەوەی ئەمڕۆی ئەنجومەنی نوێنەرانی عیراقدا داوامانکرد، بوودجەیەکی تایبەت بۆ ئاوەدانکردنەوەی هەڵەبجە لەبەرامبەر گۆڕینی لەقەزاوە بۆ پارێزگا تەرخانبکرێت" کاروان یاروەیس وایوت

وتیشی:" پێشنیار و تێبینی پەرلەمانتاران لەسەر پرۆژەکە پێشکەش بەهەردوو لیژنەی یاسایی و لیژنەی هەرێمەکان لەئەنجومەنی نوێنەران کراوەو چاوەڕواندەکرێت لەداهاتوویەکی نزیکدا پرۆژەکە بخرێتە کارنامەی پەرلەمانەوە و دەنگی لەسەر بدرێت".

بڕیاردەری فراکسیۆنی یەکێتی لە ئەنجومەنی نوێنەرانی عیراق راشیگەیاند:" سوپاس و دەستخۆشی لە سەرۆک وەزیرانی عیراق و سەرۆکایەتی پەرلەمان و هەموو ئەو فراکسیۆن و پەرلەمانتارانە دەکەین، کە هاوڕابوون لەگەڵمان بە مەبەستی بەپارێزگابوونی هەڵەبجە".

پێشتریش د. بڕ‌یار ره‌شید ئه‌ندامی ئه‌نجومه‌نی نوێنه‌رانی عیراق به‌ سایتی ره‌سمی یه‌كێتیی نیشتمانیی كوردستان PUKMEDIA ی راگه‌یاندبوو: "له‌سه‌ر داواكاری فراكسیۆنی یه‌كێتی له‌ئه‌نجومه‌نی نوێنه‌رانی عیراق، ئه‌مڕۆ خوێندنه‌وه‌ی دووهه‌م و كۆتایی بۆ پڕ‌ۆژه‌ یاسای به‌پارێزگابوونی هه‌ڵه‌بجه‌ ده‌كرێت" .
 
له‌ دانیشتنی شه‌وی 16-4-2023ی ئه‌نجومه‌نی نوێنه‌رانی عیراقدا، فراكسیۆنی یه‌كێتیی نیشتمانیی كوردستان ئیمزای بۆ زیادكردنی به‌شه‌بودجه‌یه‌كی تایبه‌ت بۆ پارێزگایی هه‌ڵه‌بجه‌ و خوێندنه‌وه‌ی دووهه‌می پڕ‌ۆژه‌ یاسای زیادكردنی پارێزگایی هه‌ڵه‌بجه‌ له‌عیراق بۆ دانیشتنی داهاتووی ئه‌نجومه‌نی نوێنه‌ران كۆكرده‌وه‌، له‌سه‌ر ئاستی عیراقیش وه‌زاره‌تی پلاندانان و وه‌زاره‌تی گه‌یاندن كار بكه‌ن بۆ ھێنانه‌ كایه‌ی كۆدی نێوده‌وڵه‌تی بۆ پارێزگاكه‌ و دانانی ھه‌ڵه‌بجه‌ له‌نه‌خشه‌ی جیھان وه‌ك پارێزگا.

PUKMEDIA