ده‌زگای ئاسایش: ئارام و شه‌رمین له‌سه‌ر خراپ به‌كارهێنانی ده‌سه‌ڵات راگیراون

PUKMEDIA

دەزگای ئاسایش

ده‌زگای ئاسایشی هه‌رێم روونكردنه‌وه‌یه‌ك له‌باره‌ی راگرتنی ئارام حه‌سه‌ن و شه‌رمین عه‌لی بڵاوده‌كاته‌وه‌و ئاماژه‌ بۆ ئه‌وه‌ده‌كات:" دۆسیه‌ی ناوبراوان هیچ په‌یوه‌ندییه‌كی به‌ كاری ڕ‌ۆژنامه‌وانی و ڕ‌ێكخراوه‌یی و ئازادی ڕ‌اده‌ربڕ‌ینه‌وه‌ نییه‌و به‌ مادده‌ی ( ٣٤١ )ی خراپ به‌كارهێنانی ده‌سه‌ڵات له‌یاسای سزادانی عیراقی ڕ‌اگیراون".

ده‌قی روونكردنه‌وه‌كه‌..

ڕ‌وونكردنه‌وه‌یه‌ك له‌ ده‌زگای ئاسایشی هه‌رێمه‌وه‌ بۆ ڕ‌ای گشتی سه‌باره‌ت به‌ ڕ‌اگیراوان ( ئارام حه‌سه‌ن و شه‌رمین عه‌لی )  : 

ده‌زگای ئاسایشی هه‌رێمی كوردستان ده‌رباره‌ی كه‌یسی هه‌ردوو ڕ‌اگیراو ( ئارام حه‌سه‌ن و  شه‌رمین عه‌لی  ) بۆ ڕ‌ای گشتی ڕ‌وونده‌كه‌ینه‌وه‌ كه‌ دۆسیه‌ی ناوبراوان هیچ په‌یوه‌ندیه‌كی به‌ كاری ڕ‌ۆژنامه‌وانی و ڕ‌ێكخراوه‌یی و ئازادی ڕ‌اده‌ربڕ‌ینه‌وه‌ نییه‌ ، وه‌ك هه‌ندێك كه‌س و لایه‌ن و به‌ناوچالاكوان باسی ده‌كه‌ن و ئامانجیان چه‌واشه‌كردنی ڕ‌ای گشتی یه‌ .
هه‌ردوو ناوبراوان به‌ فه‌رمانی دادوه‌ری لێكۆڵینه‌وه‌ به‌ مادده‌ی ( ٣٤١ )ی خراپ به‌كارهێنانی ده‌سه‌ڵات له‌یاسای سزادانی عیراقی ڕ‌اگیراون ، چونكه‌ فه‌رمانبه‌ری حكومه‌تن و هۆكاری ده‌ستگیركردنه‌كه‌یان ڕ‌وونه‌ .  

هه‌روه‌ها له‌ ماوه‌ی ڕ‌ابردوودا خۆیان و په‌ڕ‌اویان خراونه‌ته‌ به‌رده‌م دادوه‌ری لێكۆڵینه‌وه‌ی ئاسایش و به‌ڕ‌ێزیان بینیونی و ووته‌یانی وه‌رگرتووه‌ و هه‌موو ڕ‌ێكارێكی یاساییان بۆ گیراوه‌ته‌به‌ر ، ده‌زگای ئاسایش ته‌نها لایه‌نی جێبه‌جێكاری یاسایه‌.

بۆ به‌رچاوڕ‌وونی هه‌موو لایه‌ك له‌ ڕ‌ێكه‌وتی ٢٠٢٣/٥/٢ ڕ‌ێكخراوی خاچی سووری نێوده‌وڵه‌تی بۆ ئاگاداربوون له‌ دۆخی ڕ‌اگیراوان سه‌ردانی گرتوخانه‌ی ئاسایشیان كردووه‌ و چاویان به‌سه‌رجه‌م ڕ‌اگیراوان كه‌وتووه‌ و له‌ نێویشیاندا هه‌ردوو ناوبراوانیان بینیوه‌، له‌ چه‌ند ڕ‌ۆژی ڕ‌ابردووشدا كه‌سه‌ نزیكه‌كانیان سه‌ردانیان كردوون و چاوپێكه‌وتنیان هه‌بووه‌ . 

وه‌ك ده‌زگای ئاسایشی هه‌رێم هه‌میشه‌ ده‌رگامان كراوه‌یه‌ بۆ هه‌ر كه‌س و لایه‌نێكی یاسایی و ڕ‌ێكخراوه‌كانی مافی مرۆڤ و ڕ‌ۆژنامه‌نوسان كه‌ بیانه‌وێت به‌دواداچوون بكه‌ن و له‌ بارودۆخیان دڵنیاببنه‌وه‌ .


ده‌زگای ئاسایشی هه‌رێمی كوردستان

PUKMEDIA