سەمیر هەورامی: كێشەكانی سلێمانی چارەسەر نەكرێن لەگەڵ بەغدا رێكدەكەوین

PUKMEDIA

سەمیر هەورامی وتەبێژی قوباد تاڵەبانی جێگری سەرۆکی ئەنجومەنی وەزیران

وتەبێژی قوباد تاڵەبانی رایدەگەیەنێت، "زیاتر لە حەوت مانگە پلانی چارەسەری گرفتە داراییەكانمان بە تیمی پارتی لە حكومەت داوە، ئەگەر گرفتەكە چارەسەر نەكرێت هەوڵی رێكەوتن لەگەڵ بەغدا دەدەین".

سەمیر هەورامی وتەبێژی قوباد تاڵەبانی جێگری سەرۆكی ئەنجومەنی وەزیرانی هەرێمی كوردستان بە کوردساتی راگەیاند: "زیاتر لە حەوت مانگە پلانی چارەسەری گرفتە داراییەكانی سنووری سلێمانی و هەڵەبجەیان بە تیمی پارتی لە حكومەت داوە و تاكو ئێستا وەڵامێكی ئەوتۆ نەدراونەتەوە، ئەگەر گرفتەكە چارەسەر نەكرێت هەوڵی رێكەوتن لەگەڵ بەغدا دەدەن".

"كێشەكانی تیمی یەكێتی لەگەڵ تیمی پارتی لە حكومەتی هەرێمی كوردستان لەسەر گرفتە داراییەكانی سلێمانی و هەڵەبجە و ئیدارەكانی راپەڕین و گەرمیانە، بۆ چارەسەری ئەو گرفتانەش تاكو ئێستا وەڵامی ئەوتۆمان وەرنەگرتۆتەوە"، سەمیر هەورامی وادەڵێت.

ئاماژەی بەوەشداوە: "قوباد تاڵەبانی بەردەوام لە هەوڵدایە بۆ چارەسەركردنی گرفتە داراییەكانی سنوورەكە، ئەگەر دۆخەكە بەمشێوەیە چارەسەر نەكرا بەهیواین لەگەڵ بەغدا رێك بكەوین بۆ ئەوەی چیتر ستەم لە ئیدارەی سلێمانی نەكرێت".
PUKMEDIA