داوادەکرێت دۆسیەی بابانی شەهید ئیبراهیم بگوازرێتەوە بۆ سلێمانی

ئەرشیف

شاری سلێمانی

کەسوکاری ژمارەیەک شەهید راگەیەنراوێک لەبارەی کوشتنی کاوە بازیانی بڵاودەکەنەوە و داوا لەسێ سەرۆکایەتییەکەی هەرێم و لایەنە پەیوەندیدارەکانی دیکەی هەرێم دەکەن دۆسیەی بابانی شەهید ئیبراهیم بگوازرێتەوە بۆ شوێنی رووداوەکە.

هەر لەراگەیەنراوەکەدا ئاماژە بەوەدەکەن:" شەھیدان و باوکانی ئێمە بۆ ئەوە خۆیان فیدا نەکرد کە ئێمە ستەم و ھەڕەشەی مەرگمان لێبکرێت و نەتوانین لە شوێن پێیەکی باوکماندا بحەوێینەوە لەم نیشتمانی کوردستانە".

کەسوکاری ئەو ژمارە شەهیدە ئاماژە بەوەشدەکەن:"پشتیوانی کوڕە شەھیدێکی تاقانەی تانە لێدراوی ھەناسەساردی بێ بەش لە ھەموو ناز و باوەشێکی باوکایەتی و بێ کەس و پشت دەکەین".

هەر لەراگەیەنراوەکەدا راشیانگەیاندووە:" ئێمەى منداڵانى شەهیدان دانمان بەخۆمانداگرت و لە پێناو بەرژەوەندى کورد و کوردستان ئەم بڕیارە نادادپەروەریەمان قبوڵکرد".

کەسوکاری ئەو ژمارە شەهیدە ھەموولایەکیش ئاگادار دەکەنەوە کە دەنگیان بگات پێیان و دەڵێن:" ئێمە بەھەموو توانامان پشتگیری کاک ( بابان شەھید ابراھیم حبیب )و سەرجەم کوروکچی شەھیدان دەکەین کە لەلایەن ھەرکەس و لایەنێکەوە ستەمیان لێبکرێت".

لە کۆتایی راگەیەنراوەکەدا کەسوکاری ئەو ژمارە شەهیدە دەلێن:" داواکارین ئەنجومەنی باڵای دادوەری حکومەتی هەرێمی کوردستان کەیسی دادگاییکردنەکە بگوازێتەوە بۆ شوێنی ڕووداوەکە ".

وارسی ئەو شەهیدانە راگەیەنراوەکە ئاڕاستەی (سەرۆکایەتی ھەرێمی کوردستان و سەرۆکایەتی پەرلەمانی کوردستان و سەرۆکایەتی ئەنجومەنی وەزیران و وەزارەتی کاروباری شەھیدان و ئەنفالکراوان و وەزارەتی داد و وەزارەتی پێشمەرگە و وەزارەتی ناوخۆ و دەزگای ئاسایش و لایەن و حزبە سیاسیەکان و رێکخراوەکانی مافی مرۆڤ و کەسایەتی و نوسەر و ڕوناکبیران و  سەندیکای پارێزەران و دەزگاکانی ڕاگەیاندن و رای گشتی و کۆمەڵانی خەڵک) دەکەن.

PUKMEDIA