سەمیر هەورامی: کێشەی موچەی سلێمانی چارەسەر بکرێت پاشان باسی گەڕانەوە بکرێت

PUKMEDIA

سەمیر هەورامی

وتەبێژی قوباد تاڵەبانی رایدەگەیەنێت: "داواکاری تیمی وزاری یەکێتی داواکاری گشتییەو چارەسەری کێشەی دروستکراوی دارایی و موچەی فەرمانبەرانی سلێمانی لە ئەولەویەتی داواکارییەکانی تیمی یەکێتییە".

سەمیر هەورامی وتەبێژی قوباد تاڵەبانی جێگری سەرۆكوەزیرانی هەرێمی كوردستان بە سایتی رەسمی یەکێتیی نیشتمانیی کوردستان PUKMEDIA ی رایگەیاند: "داوامان كردووە كێشەی موچە لە سلێمانی چارەسەر بكرێت، ئەوجا باسی گەڕانەوەی تیمی یەكێتی بكرێت بۆ حكومەت و پێویستە موچە تێكەڵاوی ململانێ‌ سیاسیەكان نەكرێت".

دەشڵێت: "بۆ دابینكردنی موچە سلێمانی 30 بۆ 32 ملیار دینار كورتهێنانی هەیە، داوامانكردووە پرسی موچە تێكەڵ بە ململانێ سیاسییەكان نەكرێت".

"داواكارییەكانی یەكێتی داواكاریی گشتین، كە سەرەكیترینیان پرسی موچەیە، دەمانەوێت لە هەرێمی كوردستان موچە بكرێت بە سیادی، ناكرێت لە شارێك دابەش بكرێت و لە شارێكی دیكە دابەش نەكرێت"، سەمیر هەورامی وایوت.

سەبارەت بەوەی كە لە سلێمانیش جیاكاری لە دابەشكردنی موچە كراوە بەپێی راگەیەندراوێكی وەزارەتی دارایی، سەمیر هەورامی دەڵێت: "گرفتی كەمی داهات لە سلێمانیدا هەیە و تەنیا موچەی پێشمەرگەی ئەیلول و گوڵان نەوەستاوە، بەڵكو موچەی شارەوانی و وەزارەتی ئاوەدانكردنەوە و نیشتەجێكردنیش دابەش نەكراوە".

وتەبێژی قوباد تاڵەبانی دەشڵێت: "لەمانگی 11ی ساڵی رابردوەوە راپۆرتی چارەسەری کێشە داراییەکانی سنوری پارێزگای سلێمانی و هەموو هەرێمی کوردستانمان خستوەتە روو، چاوەڕوانی وەڵامی راپۆرتەکەین، بەڵام تا ئێستا لایەنی پەیوەندیدار هیچ وەڵامێکی نەبووە، بۆیە گەشبین نین بەوەفدی وەزارەتی دارایی بۆ چارەسەرکردنی ئەو کێشەیە، لەگەڵ ئەوەشدا چەندین جار رامانگەیاندووە ناکرێت بەراوردی داهاتی خاڵی سنوری ئیبراهیم خەلیل و پەروێزخان بکرێت، ئاشکرایە کە داهاتی سلێمانی بەراورد بەو ناوچانەی دیکە کەمترە".

PUKMEDIA