بەشدار حەسەن: شیروان شێروانی لە دادگا تۆمەتەکانی رەتکردەوە

PUKMEDIA

بەشدار حەسەن

سەرۆکی تیمی پارێزەرانی دەستگیرکراوانی بادینان رایدەگەیەنێت، "ئەو تۆمەتانەی ئاڕاستەی رۆژنامەنووس و چالاکوان شیروان شێروانی کرابوو لەبەردەم دادوەر رەتکرایەوە".

شیروان شێروانی بە کەلەپچەوە هێنرایە دادگا

بەشدار حەسەن سەرۆکی تیمی پارێزەرانی دەستگیرکراوانی بادینان بە PUKMEDIA ی راگەیاند: "کەمێک پێش ئێستا رۆژنامەنووس شیروان شێروانی بە دەست و پێ کەلەپچەکراوی هێنرایە دادگای لێکۆڵینەوەی دەشتی هەولێر له کەسنەزان".
"دواتر لە بەردەم دادوەری دادگای لێکۆڵینەوەی دەشتی هەولێر کەلەپچەکانیان لێکردەوە و وتەکانی لێ وەرگیرا، بە ئازادانە ووتەکانی خۆی دا لە ژووری دادوەر بە ئامادەبوونى بەڕێز ئەندامی داواکاری گشتی و ی. لێکۆڵەرەوەی دادی و کاک زەیتۆ سیان نوێنەری یۆنامی و بەندە و پارێزەران باڤێل شيرزاد و کارزان محمدامین "، بەشدار حەسەن وادەڵێت.

شیروان شێروانی تۆمەتەکانی رەت کردەوە

دەشڵێت: "شایانی باسە لەسەر دوو کەیس شیروان شێوانی هێنرایە بەردەم دادوەر، یەکەمیان، سکاڵای ئەفسەرێکی ناو چاکسازی بەپێی ماددە ٢٢٩ و و دوەمیان تۆمەتێکی خراوەتەپاڵ بە ماددە ٢٨٩-٢٩٨ گوایە تەزویرکردوە لە پەنجەمۆرێک لە جیاتی گوهدار زێباری کە رۆژنامەنوس شیروان شێروانی هەردوو تۆمەتی رەتکردەوە و وتی، من بێ تاوانم لەم تۆمەتانەی خراوەتە پاڵم".
ئاماژەی بەوەشدا: "هەروەها دکتۆرە مونا یاقۆ سەرۆکی دەستەی مافی مرۆڤ و فيض الله راوێژکاری سەرۆکی دەستەی مافی مرۆڤ بۆ هەمان مەبەست نیو کاتژمێر لەگەڵ دادوەر دانیشتن و گفتوگۆیان کرد لەسەر هەردوو کەیسەکەی شیروان شێروانی".

پێشتریش رۆژی 2023-04-16، بەشدار حەسەن رایگەیاندبوو، "کەیسێکی دیکە بۆ رۆژنامەنووس شیروان شێروانی کراوەتەوە و براوەتە دادگای لێکۆڵینەوەی دەشتی هەولێر، بەڵام بەهۆی ئەوەی نە خودی شێروان و نە تیمی پارێزەران ئاگادار نەبووین بۆیە دادگاییەکەش دواخراوە".
PUKMEDIA