کاروان گەزنەیی: پارێزگای سلێمانی لەژێر گەمارۆیەکی مەترسیداری حکومەتی ھەرێمدایە

ئەرشیف

کاروان گەزنەیی ئەندامی یەکێتی لە پەرلەمانی کوردستان

ئەندامێکی پەرلەمانی کوردستان رایدەگەیەنێت:"سلێمانی مانگانە پێویستی بە ٣٦٢ ملیار دینارە بۆ دابینکردنی مووچە و لە ھەشت مانگی رابردوودا ٥٠٠ ملیار دینار کەمتر لەوەی بڕیاری لێدراوە نێردراوە بۆ بانکەکانی سلێمانی"،دەشڵێت:"پارێزگای سلێمانی لەژێر گەمارۆیەکی مەترسیداری حکومەتی ھەرێمدایە".

کاروان گەزنەیی ئەندامی یەکێتی لە پەرلەمانی کوردستان لە میانی بەشداریکردنی لە بەرنامەیەکی کوردسات نیوزدا رایگەیاند:" سلێمانی مانگانە پێویستی بە ٣٦٢ ملیار دینارە بۆ دابینکردنی مووچە و لە ھەشت مانگی رابردوودا ٥٠٠ ملیار دینار کەمتر لەوەی بڕیاری لێدراوە نێردراوە بۆ بانکەکانی سلێمانی".

ئاماژەی بەوەشکرد:" پارێزگای سلێمانی لەژێر گەمارۆیەکی مەترسیداری حکومەتی ھەرێمدایە، سەرەڕای روونی داھاتەکان و کەمی داھاتەکانی پارێزگاکە، حکومەتی ھەرێم داوا دەکات ئیدارەی شارەکە خۆی بڕی کورتھێنان لە پارەی مووچە پڕبکاتەوە".

وتیشی:"وەزیری دارایی خۆی خەڵکی سلێمانییە، سەیرە بەلامەوە ویژدانی ریگەی پێدەدات بەم بەرەجەژنە مووچە دابین نەکرێت، خۆشی بزانێت لەماوەی ٦ مانگی رابردوو داهاتی نەوت ٥ ملیار دۆلار بووە، بەڵام جورئەت نەکات دەستلەکاربکێشێتەوە، ئینسان دەکرێت پۆستەکەی لەدەست بدات بەڵام ناکرێت کەرامەتی لەدەست بدات" .

راشیگەیاند:"ناکرێت بەرپرسێکی ئەم حکومەتی هەرێمی کوردستانە بیت، دانیشیت بەدیار خنکاندنی سلێمانییەوە بەدیار ئەوەی مووچەخۆرێک مووچە وەرنەگرێت، ٥ ملیار دۆلار داهاتی نەوتی هەرێمەکەت بێت، بڵێی دەبێت بە ٦٠ ملیاری خۆت مووچە بدەیت خەرجی نەخۆشخانەکان بدەیت، پێداویستییەکانی سلێمانی پڕ بکەیتەوە.

PUKMEDIA