هاووڵاتیه‌كی هه‌ولێر: چه‌كداری حزب ژن و كچه‌كانم-یان ده‌ستبه‌سه‌ر كردوه‌

PUKMEDIA

هاووڵاتی هەڕەشەلێکراو

چه‌ند چه‌كدارێكی حزبی و حكومه‌ت له‌هه‌ولێر هه‌ڕه‌شه‌ی كوشت و سه‌ربڕین له‌هاووڵاتییه‌ك ده‌كه‌ن و پێی ده‌ڵێن ئه‌گه‌ر ئه‌و به‌ڵگانه‌ی له‌دژی ئێمه‌ لاته‌ بڵاوی بكه‌یته‌وه‌ كچه‌كانت به‌كارده‌هێنین و ئابڕووت ده‌به‌ین.

هاووڵاتییه‌ك له‌هه‌ولێر ئه‌مڕۆ به‌هۆی ئه‌و سوكایه‌تییه‌ی پێیده‌كرێت، له‌كۆنگره‌یه‌كی رۆژنامه‌وانیدا وتی: "له‌لایه‌ن چه‌ند كادرێكی حزب و چه‌كداری پۆلیسه‌وه‌ ژنه‌كه‌م و منداڵه‌كانم لێ داگیركراوه‌و هه‌ڕه‌شه‌ی كوشتن و سه‌بڕینم لێده‌كرێت ئه‌گه‌ر داوایان بكه‌مه‌وه‌".

"چه‌ندین به‌ڵگه‌م هه‌یه‌ كه‌ ئه‌و گروپه‌ له‌هه‌ولێر هه‌ڕه‌شه‌م لێده‌كه‌ن، به‌ڵام به‌كچه‌كانم كه‌ لای ئه‌وانه‌ هه‌ڕه‌شه‌یان لێكردووم و پێیان وتووم ئه‌گه‌ر به‌ڵگه‌كان بڵاو بكه‌یته‌وه‌ كچه‌كانت به‌كارده‌هێنین، هه‌روه‌ها داوای 25 گه‌ڵام لێده‌كه‌ن وه‌ك سه‌رانه‌ بیانده‌مێ"، ئه‌و هاووڵاتیه‌ وایوت.

ئه‌و هاووڵاتیه‌ ده‌شڵێت: "به‌ئاشكرا پێیان وتووم حساب بۆ پۆلیس و ئاسایش و هێزه‌ ئه‌منییه‌كانی هه‌ولێر ناكه‌ین، كه‌واته‌ روونه‌ ئه‌وان حزبیان له‌پشته‌و كه‌س ناتوانێت هیچیان به‌رامبه‌ر بكات، بۆیه‌ داوا له‌داواكاری گشتی ده‌كه‌م كه‌ خێزانه‌كه‌م بۆ بگه‌ڕێننه‌وه‌".

بۆ بینینی کۆنگرە رۆژنامەوانییەکە کلیک لێرە بکە

هه‌ر ئه‌مڕۆ شه‌ممه‌ 15-4-2023  له‌شاری هه‌ولێر هێرشكرایه‌ سه‌ر پارێزه‌رێك و دوای لێدانێكی زۆر وه‌ك ئه‌تك كردنێكیش سه‌ریان تاشی و ناردیانه‌وه‌ بۆ ماڵه‌وه‌، هه‌روه‌ها له‌ تۆڕه‌ كۆمه‌ڵایه‌تییه‌كان ئه‌مڕۆ ڤیدیۆیه‌ك بڵاوكرایه‌وه‌ كه‌ چه‌ند گه‌جێك داوای سه‌رانه‌ له‌گه‌نجێكی دیكه‌ ده‌كه‌ن و ئازار ده‌ده‌ن.

ئه‌و كرده‌وه‌ نامرۆڤایه‌تییانه‌ی له‌هه‌ولێر رووده‌ده‌ن كادری باڵای حزب و كاربه‌ده‌ستی حكومه‌تی له‌پشته‌وه‌یه‌، ئه‌وه‌ش بوه‌ته‌ هۆی ناوزڕاندنی شاره‌كه‌و پێشلكردنی مافی مرۆڤ له‌هه‌رێمی كوردستان به‌گشتی، هه‌ر ئه‌مه‌شه‌ وایكردوه‌ كه‌ رێكخراوه‌ نێوده‌وڵه‌تییه‌كان له‌ راپۆرتی ساڵانه‌ی خۆیاندا باس له‌زیادبوونی پێشلكردنی مافی مرۆڤ له‌هه‌رێمی كوردستان بكه‌ن و ئه‌وه‌ش بخه‌نه‌ڕوو كه‌ پێشێلكاریه‌كان به‌راوورد به‌ساڵانی رابردوو زۆر زیادیكردوه‌.
PUKMEDIA