وەزیری کۆچی عیراق: حکومەتی هەرێم رێگرە ئاوارەکان بگەڕێنەوە

PUKMEDIA

ئیڤان فایەق جابرۆ وەزیری کۆچ و کۆچبەرانی عیراق

وەزیری کۆچ و کۆچبەرانی عیراق رایدەگەیەنێت:"دەسەڵاتمان بەسەر کەمپی ئاوارەکانی هەرێمی کوردستاندا نییە".

لەمیانی بەشداریکردنی لەبەرنامەیەکی تایبەتی کەناڵی رەشید ی عیراقی-دا، ئیڤان فایەق جابرۆ وەزیری کۆچ و کۆچبەرانی عیراق سەبارەت بە رەوشی ئاوارەکانی سنوری هەرێمی کوردستان رایدەگەیەنێت:" دەسەڵاتمان بەسەر کەمپی ئاوارەکانی هەرێمی کوردستاندا نییە، چونکە لێپرسراوی ئەم کەمپانە لەهەرێمی کوردستان وەزارەتی ناوخۆیە و لەلایەن رێکخراوی بارزانیشەوە ئیدارەی کەمپەکان دەدرێت".

راشیگەیاند:" سوپاسی هەرێمی کوردستان دەکەین کە ژمارەیەکی زۆر ئاوارەی لەخۆگرتووە، بەڵام لەهەمانکاتدا هیوادارین حکومەتی هەرێمی کوردستان دەرگا بۆ ئاوارەکان واڵابکرێت تا بگەڕێنەوە زێدی خۆیان".

پێشێلکارییەکان بەرامبەر بە ئاوارەکانی کەمپەکانی هەولێر و دهۆک رابگیرێت

هاوکات وەزیری کۆچ و کۆچبەرانی عیراق ئاماژەی بەوەشکرد، راپۆرتە نێودەوڵەتییەکان باسی پێشێلکاریی لە کەمپی ئاوارەکانی هەرێم دەکەن، هەربۆیە داوا لە مەسعود بارزانی سەرۆکی پارتی دیموکراتی کوردستان دەکەم هەوڵبدات پێشێلکارییەکان بەرامبەر بە ئاوارەکانی کەمپەکانی هەولێر و دهۆک رابگرێت.

لەهەرێمی کوردستاندا ٢٦ کەمپی ئاوارەکان هەیە و تا ئێستا هیچیان دانەخراون، لەکاتێکدا لەکۆتاییەکانی ساڵی ٢٠٢١دا وەزارەتی کۆچ و کۆچبەرانی عیراق رایگەیاند: سەرجەم کەمپەکانی ئاوارەکان داخراون، بێجگە لە کەمپەکانی هەرێمی کوردستان.

داخستنی کەمپەکانی هەرێم کارێکی قورسە

هاوکات لە ١٨-١٢-٢٠٢١ دا ئیڤان فایەق جابرۆ وەزیری کۆچ و کۆچبەرانی عیراق لەکۆنگرەیەکی رۆژنامەوانیدا رایگەیاندبوو: داخستنی کەمپەکانی هەرێم کارێکی قورسە، چونکە وەزارەتەکەمان هیچ دەسەڵاتێکی بەسەردا نییە و حکومەتی هەرێم سەرپەرشتی دەکات، بۆیە وەزارەتەکەمان ناتوانێت فشار بخاتە سەر حکومەت بۆ داخستنی کەمپەکان و هیوادارین حکومەتی فیدڕاڵی بۆ ئەو مەبەستە دەرگای گفتوگۆ لەگەڵ حکومەتی هەرێم بکاتەوە.

هەر لە کۆنگرەکەدا ئیڤان فایەق جابرۆ رایگەیاندبوو: لەگەڵ گەڕانەوەی ئارەزومەندانەی ئاوارەکانین، بەڵام ئیرادەیەکی راستەقینە لەهەرێمی کوردستان بۆ کۆتایی هێنان بەدۆسیەی ئاوارەکان نییە.

PUKMEDIA