مەكتەبی سیاسی: یادی روخانی رژێم بكرێتە رێگری لە تاكڕەوی

PUKMEDIA

یەكێتیی نیشتمانیی كوردستان

لەیادی رووخاندنی رژێمی بەعسدا، مەكتەبی سیاسی یەكێتیی نیشتمانیی كوردستان پەیامێكی بڵاوكردەوە و رایگەیاند: " عیراقی نوێی پێویستی بە كاركردنی پێكەوەییە و ئومێدەوارین بیری تاكڕەوی و خۆسەپێنی  كۆتایی پێبهێنرێت و بەرژەوەندییە گشتییەكانی گەلەكەمان بخرێنە پێش بەرژەوەندییە شەخسی وحزبیەكانەوەو  واز لەچاوساغی وپەلكێشی دەرەكی بۆسەرخاك و ئاسمانی عیراق و هەرێمی كوردستان بهێنرێت" .

دەقی پەیامەكە:

ئیمڕۆ كە یادی بیست ساڵەی روخاندنی رژێمی بەعسی دیكتاتۆردەكەینەوە، ئەو وانەیە وەبیر هەموو لایەك دەهێنێتەوە كە ئەو رژێمەی بەزەبری هێز و كوشت وبڕی گەلانی عیراق و خنكاندنی گشت مافە ئازادی و دیموكراتییەكان 35 ساڵ جڵەوی حوكمی لەدەستدا بوو،  سەرئەنجامەكەی روخان و كەوتن بوو . 

  لە عیراقی نوێی دوای بیست ساڵەی روخانی دیكتاتۆریدا زیاتر پێویستمان  بە هەنگاوەكانی  پێكەوەیی كاركردنە  لەچوارچێوەی عیراقێكی فیدڕاڵیدا كە ئەرك و مافەكانی هاووڵاتیانی وەك یەك تێدا جێبەجێبكرێت و ئارامی و ئۆقرەیی بۆ هەموان دابین بكرێت تاوەكو گشت ناوچەكان لەهەر هەڕەشەو پەلامارێكی دەرەكی پارێزراوبن  . 

 هەرلەم یادەدا ئومێدەوارین بیری تاكڕەوی و خۆسەپێنی  كۆتایی پێبهێنرێت و بەرژەوەندییە گشتییەكانی گەلەكەمان بخرێنە پێش وسەروو بەرژەوەندیەشەخسی وحزبیەكانەوەو  واز لەچاوساغی وپەلكێشی دەرەكی بۆسەرخاك و ئاسمانی عیراق و هەرێمی كوردستان بهێنرێت .


مەكتەبی سیاسی
یەكێتیی نیشتمانیی كوردستان

  PUKMEDIA