سه‌میر هه‌ورامی: راگه‌یه‌ندراوه‌كه‌ی وته‌بێژ كۆبوونه‌وه‌ی یه‌كێتی و پارتی هه‌ڵوه‌شانده‌وه‌

PUKMEDIA

سەمیر هەورامی وتەبێژی جێگری سەرۆک وەزیرانی هەرێم

سه‌میر هه‌ورامی وته‌بێژی جێگری سه‌رۆكی ئه‌نجومه‌نی وه‌زیرانی هه‌رێم رایده‌گه‌یه‌نێت:" قوتی هاووڵاتیانی ده‌ڤه‌ری سلێمانی، كێشه‌ی سه‌ره‌كیی قوباد تاڵه‌بانی -یه‌، بۆیه‌ ناچێته‌وه‌ كۆبوونه‌وه‌كانی ئه‌نجومه‌نی وه‌زیران" به‌ڵام:" قوباد تاڵه‌بانی له‌ ئه‌ركه‌ حكومییه‌كانی به‌رده‌وامه‌ كاره‌كانی خۆی جێبه‌جێده‌كات و ته‌نها بایكۆتی كۆبونه‌وه‌وه‌كانی ئه‌نجومه‌نی وه‌زیرانی هه‌رێمی كردووه‌" ، ئاشكراشیكرد :"به‌هۆی راگه‌یەندراوه‌كه‌ی وته‌بێژی حكومه‌ت كۆبوونه‌وه‌یه‌كی یه‌كێتیی و پارتی هه‌ڵوه‌شایه‌وه‌ كه‌ پێشتر ئاماده‌كاریی بۆ كرابوو". 

" له‌ كابینه‌ی رابردووه‌وه‌ به‌شێكی چاكسازییه‌كان كه‌ له‌حكومه‌ت كراوه‌ له‌سه‌ر ده‌ستی قوباد تاڵه‌بانی و نوسینگه‌كه‌ی بووه‌، كه‌ بێگومان نێچیرڤان بارزانییش له‌كابینه‌ی پێشوو له‌گه‌ڵمان بووه‌، به‌ڵام له‌م كابینه‌یه‌ به‌وشێوازه‌ بیرنه‌كراوه‌ته‌وه‌ هه‌رچی كرابێت باش بووبێت سه‌رۆكی حكومه‌ت به‌هی خۆی زانیوه‌، وه‌ به‌پێچه‌وانه‌شه‌وه‌ " سه‌میر هه‌ورامی واده‌ڵێت.

جوتیار عادل قوڕ‌میشكراوه‌

وته‌بێژی جێگری سه‌رۆكوه‌زیرانی هه‌رێم وه‌ڵامی قسه‌كانی جوتیار عادل وته‌بێژه‌كه‌ی حكومه‌تی هه‌رێم ده‌داته‌وه‌ و ده‌ڵێت:" جوتیار عادل وته‌كانی خۆی ده‌رنابڕ‌ێت، به‌ڵكو له‌لایه‌ن سه‌رۆكی حكومه‌ته‌وه‌ كۆنتڕ‌ۆڵ ده‌كرێت و بۆیه‌ ئه‌و وته‌بێژی پارتییه‌ نه‌ك حكومه‌ت، ناوبراو وته‌كانی خۆی ده‌رنابڕ‌ێت، به‌ڵكو له‌لایه‌ن سه‌رۆكی حكومه‌تی هه‌رێمه‌وه‌ قورمیش ده‌كرێت". 

دانیشتنه‌كه‌ هه‌ڵوه‌شایه‌وه‌

"پێش نه‌ورۆز ئاماده‌كاری كرابوو یه‌كێتی و پارتی پێكه‌وه‌ دانیشتن ئه‌نجام بده‌ن، به‌ڵام به‌هۆی راگه‌یه‌ندراوێكی وته‌بێژی حكومه‌ته‌وه‌ دانیشتنه‌كه‌ هه‌ڵوه‌شایه‌وه‌." سه‌میر هه‌ورامی وای وت.

سه‌باره‌ت به‌ كۆبونه‌وه‌كانی فراكسیۆنی یه‌كێتی و پارتیش سه‌میر هه‌ورامی ده‌ڵێت:" كۆبونه‌وه‌كان له‌سه‌ر پرسه‌كانی هه‌ڵبژاردن به‌رده‌وام ده‌بن و یۆنامیش پێشنیازێك سه‌باره‌ت به‌ شێوازی ئه‌نجدامدانی هه‌ڵبژاردنه‌كان ده‌خاته‌ڕ‌وو".

PUKMEDIA سه‌رچاوه‌ / كه‌ناڵی ئێن. ئاڕ‌.تی