سەرۆک بافڵ: بەسودوەرگرتن لەرێبازی مامۆستا ئیبراهیم درێژە بەخەبات دەدەین

PUKMEDIA

مامۆستا ئیبراهیم ئەحمەد

سەرۆکی یەکێتی لە ساڵیادی کۆچی دوایی مامۆستا ئیبراهیم ئەحمەددا دەڵێت: "مامۆستا ئیبراهیم و هەوڵەکانی لەپێناو سەربەرزیی کورد و بەدیهێنانی مافەکانیدا، هێندە زێڕین و درەوشاوەیە کە بۆ هەمیشە وەک چرای رێگە و رێنیشاندەرمان دەمێنێتەوە".

دەقی پەیامەکە:

بە ئەوپەڕی پێزانین و وەفاداریمانەوە یادی کۆچی دوایی سیمبوولی نیشتمانپەروەری و مامۆستای کوردایەتی، مامۆستا ئیبراهیم ئەحمەدی نەمر دەکەینەوە.
‏‎ئێمە لە مامۆستا ئیبراهیم ئەحمەد و هەڵوێستە نەتەوەیی و نیشتمانییەکانییەوە فێری وانەکانی کوردپەروەری و دڵسۆزی بووین بەرامبەر کورد و کوردستان. فێربووین قوربانیدان لەپێناو كورد لە هەرجێیەك بێت شانازییە و رێنیشاندانی بێگانە شەرمەزارییە.
‏‎

مێژووی مامۆستا ئیبراهیم و هەوڵەکانی لەپێناو سەربەرزیی کورد و بەدیهێنانی مافەکانیدا، هێندە زێڕین و درەوشاوەیە کە بۆ هەمیشە وەک چرای رێگە و رێنیشاندەرمان دەمێنێتەوە. ئێمە بە سوودوەرگرتن لە بیر و رێبازی بەرزی سەركردەكانمان درێژە بە خەبات دەدەین و بەگیانی خۆمان ناوی كورد بە سەربەرزی و زیندوویی لەمێژوودا دەنووسینەوە.
‏‎دروود بۆ رۆحی پاكی مامۆستا ئیبراهیم و سەرفرازیی بۆ رێبوارانی رێگای ئازادی

بافڵ جەلال تاڵەبانی
سەرۆکی یەکێتیی نیشتمانیی کوردستان

PUKMEDIA