سەرۆک بافڵ: یەکێتی لە سەرەتاوە لەگەڵ چارەسەرکردنی یەکجارەکی کێشەکان بووە

نوسینگەی رۆژنامەوانی سەرۆکی یەکێتی

کۆبوونەوەی سەرۆکی یەکێتیی نیشتمانیی کوردستان و سەرۆکی هاوپەیمانی عەزم

بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە موسەنا سامەرائی، سەرۆکی هاوپەیمانیی عەزم کرد.

‌‎لە دیدارێکدا دوایین گۆڕانکارییە سیاسی و ئابوورییەکان تاوتوێکران و جەخت لە هەماهەنگی نێوان هێز و لایەنە سیاسییەکان و بەردەوامیی گفتوگۆکان کرایەوە لەپێناو چارەسەرکردنی کێشەکان و پاراستنی سەقامگیری لە وڵاتدا.

‌‎رێککەوتنی نێوان هەرێم و بەغدا لەسەر پرسی نەوت و هەناردەکردنی تەوەرێکیتری کۆبوونەوەکە بوو و سەرۆک بافڵ جەلال تاڵەبانی ئاماژەی بە گرنگی رێککەوتنەکە کرد و رایگەیاند، یەکێتی لە سەرەتاوە لەگەڵ چارەسەرکردنی یەکجارەکی کێشەکان و کۆتاییهێنان بە ناکۆکییەکان بووە. رێککەوتنی هەرێم و بەغدا سەبارەت بە پرسی نەوت و هەناردەکردنی لە ڕێگەی سۆمۆوە، هەنگاوێکی گرنگە بۆ دەستپێکردنی قۆناغێکی نوێی سیاسی و چارەسەرکردنی کێشەکان لەڕێگەی دەستوورەوە.

PUKMEDIA