دەسەڵاتی فرۆکەوانی عیراق داوای رونکردنەوە لە تورکیا دەکات

PUKMEDIA

فرۆکەخانەی سلێمانی

پەرلەمانتارێکی یەکێتی بەدواداچون بۆ راگرتنی هەموو گەشتێکی هاتن و چون بەسەر ئاسمانی تورکیاوە بۆ فرۆکەخانەی سلێمانی دەکات و رایدەگەیەنێت: " دەسەڵاتی فرۆکەوانی مەدەنی عێراق بە رەسمی داوای روونکردنەوەیان لە دەسەڵاتی فرۆکەوانی تورکیا کردوە".

کاروان یاروەیس ئەندامی لیژنەی گواستنەوەو پەیوەندییکردنی ئەنجومەنی نوێنەران تایبەت بە سایتی رەسمی یەکێتیی نیشتمانیی کوردستان PUKMEDIA ی راگەیاند: "سەبارەت بە راگرتنی گەشتە ئاسمانیەکانی هێڵی تۆرکش ئێرلاین و هەموو گەشتێک لە ئاسمانی تورکیاوە بۆ فرۆکەخانەی سلێمانی، بەدواداچوونەکانمان وەک لیژنەی گواستنەوەو پەیوەندییکردنی پەرلەمانی عێراق دەست پێکردووەو لەگەڵ سەرۆکی دەسەڵاتی فرۆکەوانی مەدەنی عێراق لە فرۆکەخانەی نێودەوڵەتی بەغدا کۆبووینەوەو بە نوسراوی رەسمی داوای روونکردنەوەو گرتنەبەری ڕێوشوێنی پێویستمان کردووەو لەگەڵ بەرێوەبەری فرۆکەخانەی نێودەوڵەتی سلێمانی لەسەرخەتین".

"بەپێی بەدواداچوونەکانمان هیج کێشە و کەمورکورتیەکی هونەری و ئیداری لەلایەن فرۆکەخانەی سلێمانیەوە نیەو دەسەڵاتی فرۆکەوانی مەدەنی عێراق ئەمەیان سەڵماندووە، بڕیارەکە لەلایەن وەزارەتی دەرەوەی تورکیاوە دراوە بە دەستەڵاتی فرۆکەوانی تورکیا و فەرمانیان پێکردوون هەموو گەشتێکی هاتن و رۆیشتن بەسەر ئاسمانی تورکیاوە بۆ فرۆکەخانەی سلێمانی قەدەغە بکەن"، کاروان یاروەیس وایوت.

دەشڵێت: "دەسەڵاتی فرۆکەوانی مەدەنی عێراق لەهەوڵی جددیدایە تا کێشەکە چارەسەر بکات و بە رەسمی داوای روونکردنەوەیان لە دەسەڵاتی فرۆکەوانی تورکیا کردوە بەڵام تائێستا وەڵامیان نەداوەتەوە".

PUKMEDIA