سەرۆکی پەرلەمان: میللەتەکەمان بەهۆی نەوتەوە ساڵانێکی سەختی پڕ قەیرانی تێپەڕاند

PUKMEDIA

د. رێواز فایەق سەرۆکی پەرلەمانی کوردستان

د.رێواز فایەق سەرۆکی پەرلەمانی کوردستان، پێشوازی لە لێکتێگەیشتنی حکومەتی ئیتیحادی و حکومەتی هەرێمی کوردستان دەکات و دەڵێت، "هیوادارین ئەم لێکتێگەیشتنە ببێتە سەرەتایەکی باش و هاوبەش سەبارەت بە دۆسیە هەڵپەسێردراوەکانی نێوان حکومەتی ئیتیحادی و حکومەتی هەرێم".

سەرۆکی پەرلەمان ئاماژەی بەوەداوە: "گەلی کوردستان ساڵانێکی سەختی لە قەیرانی تاقەتپڕووکێن بە هۆی ململانێکانی تایبەت بە دۆسیەی نەوت تێپەڕاند و میللەتەکەمان چاوەڕوانی ئەوەی هەموو لایەكمان هەیە کە قۆناغێکی نوێی دڵنیایی و ئارامی بەرقەرار بکەین".

دەقی پەیامەکەی سەرۆکی پەرلەمان

دوابەدوای چارەسەرکردنی دۆسیەی نەوت و غازی هەرێم لەنێوان حکومەتی ئیتیحادی و حکومەتی هەرێمی کوردستان، پەرلەمانی کوردستان پێشوازی لە رێکەوتنەکە دەکات و بەگەرمی پیرۆزبایی لە گەلی کوردستان و عێراق دەکەین، و هیوادارین ببێتە سەرەتای لێکتێگەیشتنی باش و هاوبەش سەبارەت بە هەموو دۆسیە هەڵپەسێردراوەکانی دیکە لە نێوان هەولێر و بەغدا.

گەلی کوردستان ساڵانێکی سەختی لە قەیرانی تاقەتپڕووکێن بە هۆی ململانێکانی تایبەت بە دۆسیەی نەوت تێپەڕاند، بۆیە میللەتەکەمان چاوەڕوانی ئەوەی لە هەموو لایەكمان هەیە کە قۆناغێکی نوێی دڵنیایی و ئارامی بەرقەرار بکەین و دادپەروەریی لە نێوان چین و توێژەکانی کۆمەڵگە و تەواوی شار و شارۆچکەکاندا بێتەدی.

بۆ ئەو مەبەستە و دوای دڵنیابوون لە سەرچاوەکانی داهاتی هەرێم، وەك چۆن پێداگری لەسەر شایستەییەکانی هەرێمەکەمان لە ناو بودجەی دەوڵەتی عیراق ئەکەین و وەك سەنەدی دەستوری و یاسایی بۆ بەدەستهێنانیان پشت بە یاساکەی دەبەستین، دەبێت بە هەمان لۆژیك و بنەما پێداگر بین لەسەر ئەوەی کە حکومەتی هەرێم پێویستە پرۆژە یاسای بودجە لە ئێستا و داهاتووشدا بنێرێتە پەرلەمان و هەموومان پابەندییە یاساییەکانی خۆمان لەو ڕووەوە جێبەجێ بکەین..

د.ڕێواز فایەق
سەرۆکی پەرلەمانی کوردستان