ستران عەبدوڵڵا: ئەوەی سەرۆك بافڵ لەسەر نەوت دەیڵێت سیاسەتی یەكێتییە

PUKMEDIA

ستران عەبدوڵڵا ئەندامی مەكتەبی سیاسی یەكێتی

ئەندامێكی مەكتەبی سیاسی یەكێتیی نیشتمانیی كوردستان رایدەگەیەنێت: "یەكێتی لەگەڵ ئەوەدابووە كە دۆسییەی نەوت بەهاوبەشی لەگەڵ حكومەتی عیراق بێت، چونكە سیاسەتی یەكێتی لەگەڵ ئەنجامدانی هەڵەی ستراتیژیدا نییە و پێویستە پێداچوونەوە بەسیاسەتی نەوتی هەرێمی كوردستانیشدا بكرێتەوە دەشڵێت، وتەكانی سەرۆك بافڵ لەسەر نەوت سیاسەتی یەكێتییە".

ستران عەبدوڵڵا ئەندامی مەكتەبی سیاسی یەكێتیی نیشتمانیی كوردستان لە بەرنامەی پانۆرامای كەناڵی كوردسات رایگەیاند: "ئەوەی ئەمڕۆ سەرۆك بافڵ جەلال تاڵەبانی لەسەر نەوت وتی سیاسەتی یەكێتییە، چونكە سیاسەتی یەكێتیی نیشتمانیی كوردستان یەك رۆح و یەك دەستە، هەر پەیامێك لەلایەن سەرۆكی یەكێتی یان ئەنجومەنی سەركردایەتی  و مەكتەبی سیاسییەوە دەربچێت ئەوە بۆچوون و سیاسەتی یەكێتیی نیشتمانیی كوردستانە".

"لەساڵی 1975 ەوە تا ئێستا سیاسەتی یەكێتی تەعبیری لە ویستی خەڵك كردووە و ویستوویەتی هەوڵ و  تێكۆشانەكانی خەڵكی كوردستان بەهەدەر نەچێت، هەربۆیە سیاسەتی یەكێتی لەگەڵ ئەنجامدانی هەڵەی ستراتیژیدا نییە" ستران عەبدوڵڵا وادەڵێت.

سەبارەت بە دۆسیەی نەوتیش رایگەیاند: "یەكێتیی نیشتمانیی كوردستان هەر لەسەرەتاوە لەگەڵ ئەوەبووە كە دۆسیەی نەوت لەگەڵ حكومەتی عیراق بێت، بۆیە پێویستە پێداچوونەوە بەسیاسەتی نەوتی هەرێمی كوردستاندا بكرێتەوە و سۆمۆ ببێتە مەرجەعی دۆسیەی نەوتی عیراق بە هەرێمی كوردستانیشەوە، بێگومان خەڵكی كوردستانیش پێی خۆشە نەوتی هەرێم لەلایەن سۆمۆوە بفرۆشرێت".

ئەندامەكەی مەكتەبی سیاسی یەكێتی راشیگەیاند: "دەبوایە حكومەتی هەرێم زووتر لەگەڵ عیراق رێكبكەوتایە، سیاسەتی یەكێتیی نیشتمانیی كوردستان لەگەڵ ئەنجامدانی هەڵەی ستراتیژیدا نییە و بە ئەركی خۆی دەزانێت كە هەڵەی حوكمڕانی هەرێم راستبكاتەوە، بێگومان روونیشە سیاسەتی یەكێتی لە بەرژەوەندی هەرێمی كوردستانە و خەڵكەكەیدایە".

ستران عەبدوڵڵا وتیشی: "ئەوەی  یەكێتی و سەرۆك بافڵ لە رابردوودا وتویانە دەركەوت ئەمە راستییەكەیە و لەبەرژەوەندی هەرێم و مسۆگەركردنی قوتی خەڵك بووە، هاوكات خوێندنەوەی واقیعیش  بوو بۆ دۆخی هەرێم  و عیراق، لەوچوارچێوەیەشدا بافڵ جەلال تاڵەبانی سەرۆكی یەكێتیی نیشتمانیی كوردستان لە كۆڕبەندی هەولێر بە راشكاوی رایگەیاند: "كۆمەڵگەی نێودەوڵەتی و كونسوڵی وڵاتان رەخنە و بۆچوونی خراپیان لەسەر هەرێمی كوردستان هەیە و پێویستە بەسیاسەتەكانماندا بچینەوە، سیاسەتی راست ئەوەیە كە رێككەوتن لەگەڵ بەغدا بكەین، وەك بینیشمان دوای ئەو وتانەی سەرۆ بافڵ هەرێمی كوردستان كەوتەبەر شاڵاوی راپۆرتی وەزارەتی دەرەوەی ئەمریكا و رێكخراوە نێودەوڵەتییەكان و عیراقیش بە رەسمی لە دادگای ناوبژیوانی نێودەوڵەتی پاریس داوای راگرتنی هەناردەی نەوتی كوردستانی لە بەندەری جەیهان كرد".

راشیگەیاند: "كوردایەتی ئەوەنییە سوكایەتی بەخەڵك بكەیت، لەمێژوودا نەبووە كوردایەتی بە لوتبەرزی بكرێت وەك هەندێك لە سیاسییەكانی كە ئێستا دەیكەن، بەڵكو كوردایەتی بۆ رێككەوتن و مفاوەزات و ئاشتی بووە، خەباتی كورد لە هەموو پارچەكانی كوردستان خەباتێكی بەرگری بووە نەك شەڕانگێزی و لوت بەرزی، چونكە گەلی كورد هەرگیز گەلێكی لوتبەرز نەبووە، بەڵام ئێستا بەشێك لە گوتاری سیاسی كوردستان ماڵوێرانییە چونكە بەناوی كوردایەتییەوە لوت بەرزی دەكەن و دژی گەلەكەیان دەوەستنەوە و سوكایەتی پێدەكەن و پێیان وایە كە هەر خۆیان دەزانن چی دەكەن".

  سەرۆك بافڵ لە پەیامێكیدا كە ئەمڕۆ 2-4-2023 سەبارەت بە كەیسی نەوت و بڕیارەكەی دادگای پاریس بڵاویكردەوە و رایگەیاند: "كۆمپانیای سۆمۆ نەوتی هەرێمی كوردستان بفرۆشێت و كۆی داهاتی نەوت لە سەرتاسەری عیراق بچێتە یەك خەزێنەوەو پشكی هەرێمی كوردستانیش لە بودجە و داهاتی عیراق دیاری بكرێت و مووچەی فەرمانبەر و خانەنشینانی هەرێم گەرەنتی بكرێت" و دووپاتیشی دەكاتەوە "یەكێتیی نیشتمانیی كوردستان رووبارێك خوێنی لەپێناو سەربەرزی و سەرفرازیی كوردستان رشتووە و هیچ هێز و لایەنێك لە خۆمان بە دڵسۆزتر نازانین بۆ كوردستان و بەدیهێنانی بەرژەوەندییە باڵاكانی".

PUKMEDIA