یاری بە ئاگر مەکەن...!

PUKMEDIA

سمکۆ ئەسعەد

نووسینی... سمکۆ ئەسعەد

هەڵمەتێکى نیگەرانیى فەرمى و نافەرمى لەسەر زارى ژمارەیەک لە بەرپرسە سیاسیى و حکومییەکانى هەرێمى کوردستان بەرامبەر بە کونسوڵى کشتیى ئەمریکا لە هەولێر (ئێرڤین هیکس) سەریهەڵداوە، لەسەر ئەوەى ڕاپۆرتێکى (فۆرن پۆڵسى) لە هەژمارى خۆى بڵاوکردۆتەوە، لە ڕاپۆرتەکەدا ناوى هەرێمى کوردستان بە (کارتۆنى) هێنراوە.

سوپاس بۆ خوا، تا ئێستا نیگەرانییەکانى ئەو بەرپرسانە زارەکین، و پێویستە لە ئێستا بە دوا ئەو هەڵمەتە ڕابگرن وچى تر بەردەوام نەبن، ئەبێت بزانن جەنابى (کونسولى گشتى) پارێزبەندییەکى فرە چەشنە و فرە ئاستى گوتراو و نەگوتراوى هەیە، توخن کەوتنى ئەوەندە ئاسان نییە.

سەرچاوەى خۆگرژکردن لە جەنابى (کونسوڵى گشتى) لە هەرێمدا، هەمان سەرچاوەى گرژبوونە بەرامبەر ( ئاستە ناوخۆیى و دەرەکییەکان ، بڕیارى دادگا باڵا و نێودەوڵەتییەکان، ڕێکخراوە نێودەوڵەتى و کەسایەتییە پسپۆڕەکان) کاتێک ڕاستییەک ئەدەن بە ڕووى هەرێمدا لە برى ئەوەى بپرسن : (بۆچى بەو شێوەیە هەرێم ئەبینن) ئەچن بەگژیاندا و بە درۆیاندا ئەخەنەوە و سەدان لاپەڕەى بێ بەها بڵاوئەکەنەوە .

ئەوەى بەرپرسانى هەرێم بە جەنابى (کونسوڵى گشتى) یان وتوە لەم دوو ڕۆژەدا، بەرپرسانى چین و روسیا بە دیپلۆماتکارێکى ئەمریکیان لە وڵاتەکانیاندا نەوتووە، بڵێیت ئەم بەرپرسانەى هەرێم خۆیان لەوان لا بەهێزتر بێت ونەزانن :

- ئەمریکا نەبوایە ، هەردەبوو لە ژێر هەڕەشەى بەعسدا بوونایە .
- ئەمریکا نەبوایە ، سستمى فیدرالى و مافى کورد لە دەستووردا نەئەبینرا .
- ئەمریکا نەبێت ، هەرێم بەرگەى رۆژێکى سوپاى عیراق ناگرێت .
- ئەمریکا نەبێت ، ئێوە نین .

ئێستاش نەچوە بچێت، تۆزێک لە مێژوو بخوێننەوە، پەندێک لە یابانیەکان وەرگرن، کاتێک ئەمریکا لە جەنگى جیهانى دوەەمدا بەر چەکى ئەتۆمی دان، نەیانوت ئەمریکا بۆ وایکرد، وتیان ئێمە چیمانکرد وامان بەسەر هات؟!  (کونسوڵى گشتى) ئەمریکا لە هەولێر، چەکى لە دژ بەکار نەهێناون، مەچن بە گژیا، لێى بپرسن چیمان کردووە بە (کارتۆنى) ئەمانبینن، تکایە یارى بە ئاگر مەکەن.