نوێنەری زیندانیانی بادینان: حکومەتی هەواڵگری هەرێم بەدادگای حزبی زوڵم دەکات

PUKMEDIA

بەندینخانە

نوێنەری زیندانیانی بادینان بە ناونیشانی (کورتە وەڵامێکی محەمەد سەعید سەحافەکەی بارزانی) لە راگەیەندراوێکدا وەڵامی محەمەد سەعید سەحاف دەداتەوەو دەڵێت:"پرسی ئازادی، کاری رۆژنامەوانی و خەباتی مەدەنی بە زەبرو ھێز و زیندان کۆنترۆڵ ناکرێت، سیاسەت و حوکمڕانی بریتیە لە مەعریفە و فەزیلەت کە ئەمە لە کابینەی نۆیەمدا غائیبە".

ئەیھان سەعید نوێنەری زیندانیانی بادینان لە راگەیەندراوێکدا کە وێنەیەکی بۆ PUKMEDIA نێردراوە وەڵامـی محەمەد سەعید سەحافەکەی بارزانی دەداتەوەو رایدەگەیەنێت:" چونکە دکتاتۆرەکان دژە ئازادین بۆیە پێم سەیر نیە کە سەرۆکی حکومەت لە باشترین زانکۆکانی ئەمریکا خوێندویەتی و ھێشتا فێری ئەوەنەبووە کە پرسی ئازادی رادەربرین و رۆژنامەوانی چەندە گرنگە، بۆیە بە ئاسانی دەست بە رەشبگیری چاڵاک و رۆژنامەنوسانی بادینان کرد و ئێستاش پێیان سەیرە کە بۆچی ئەو پرسە بەم شێوەیە گەورە بویە.

بە رێگای ھێز و دادگای حزبی زۆڵم بەرامبەر قەڵەم بەدەستەکانی بادینان و ھەرێم دەکەن

دەشڵێت:"چەندین جارە لە کۆنفرانسە رۆژنامەوانیەکاندا سەرۆکی حکومەت و دیندار زێباری (محەمەد سەعید سەحاف)ی کابینەی نۆیەم توڕەن لە دەستنیشانکردنی ناوی "زیندانیانی بادینان"، ھەر چەندە لای ئێمە ناوچەو زۆن و تەنانەت پارچەی کوردستانیش نین و ئەم نیشتیمانە ھەمووی یەک پارچەیە، و ئەوە ئێوەن کوردستان پارچە پارچە دەکەن و دوو ئیدارەیی زەقتر دەکەن و دەسەڵاتان تا دێگەڵەو پردێ یە، بەڵام لە حەقیقەتدا سەرۆکی حکومەت و تیمە حکومییە ھەواڵگریەکەی سنوری بادینانی دەستنیشانکرد بۆگرتن و رفاندنی چاڵاک و رۆژنامەنوسان، بەڵێ کاتێک ئەو ناوەمان دەستنیشانکرد بە مەبەست بوو کە پێتان بڵێین بادینان مۆلکی تاپۆکراوی ئێوە نیە و ئەوەتا گشت جیھان باسی دەکەن کە بە رێگای ھێز و دادگای حزبی چ زۆڵمێک بەرامبەر خەباتی مەدەنی ھاوڕێیانمان و قەڵەم بەدەستەکانی بادینان و گشت ھەرێم دەکەن".

گوێیان بەقسەی ڕای گشتی و کۆمەلگای نێودەوڵەتی نەدا

نوێنەری زیندانیانی بادینان ئەوەشی راگەیاندووە:"ئەو پرسیارەی بەردەوام لەزهنیەتی دۆگماتیکی بەشێک لە تاقمە سیاسییە خۆسەپێنی هەرێمدایە، وەک ئەوەی بێ ئاگابن لەوەی چی زوڵمێکیان بەرامبەر ئەو پۆلە ئازادیخوازە ئەنجامدا و پێیان وابوو وەک ساڵانی پێشوو دەستکراوەن و بەئاسانی دەتوانن تیرۆر، ئەشکەنجە، سەرکوتکردن و بێ سەروشوێنکردن ئەنجامبدەن و زیندانیکردنیان بە شتێکی زۆر  لاوەکی بینی و گوێیان بەقسەی ڕای گشتی و کۆمەلگای نێودەوڵەتی نەدا، نەیانزانی هەزار هێندەی تیرۆر ئەم کەیسی ڕۆژنامەوان و چالاکوانانە لەسەریان بەگران دەکەوێت".

کەیسی زیندانیانی بادینان سیاسییە و ھیچ بنەمایەکی یاسایی نیە

ئەیھان سەعید جەختیشدەکاتەوە:"بەڵێ کەیسی زیندانیانی بادینان سیاسییە و ھیچ بنەمایەکی یاسایی نیە بەڵکو دەیان مافی یاساییان کە یاسای کارپێکراوی ھەرێم، بەندی دەستوری عیراقی و جارنامەی مافی مرۆڤ پێشڵکراون، ئەم کەیسە پەیوەندی بە سەرکوتی سیاسی و نەبوونی ئازادیی و "کارتۆنیبوونی دادگا"وە هەیە لە ژێر دەسەڵاتی ئەم بەناو حکومەتە ئەقل پۆلیسییەدا، هەربۆیە هەموو لایەک گرنگی گەورەی پێ دەدەن، و ئەگەر ورد ببینەوە لە قسەکانی دیندار زێباری بەروونی دیارە پارتی چەندە لە زیندانی بادینان و شێروان شێروانی و هاوڕێکانی تۆقیوە!".

سیاسەت و حوکمڕانی بریتیە لە مەعریفە و فەزیلەت کە ئەمە لە کابینەی نۆیەمدا غائیبە

لەکۆتایدا نوێنەری زیندانیانی بادینان روونیدەکاتەوە:"پرسی ئازادی، کاری رۆژنامەوانی و خەباتی مەدەنی بە زەبرو ھێز و زیندان کۆنترۆڵ ناکرێت، سیاسەت و حوکمڕانی بریتیە لە مەعریفە و فەزیلەت کە ئەمە لە کابینەی نۆیەمدا غائیبە، لەجیاتی خۆ راستکردنەوە دێن دیسان بەچەک تەحەدای زیندانیانی بادینان دەکەن و رۆژنامەنوس گۆھدار زێباری سزادەدەن و رۆژنامەنوس قارەمان شوکری بۆ حەوت ساڵ لە کۆنجی زینداندا بەند دەکەن". 

PUKMEDIA