سەنتەری هەڵبژاردنی یەکێتی: مەرجەکانی یاسای هەڵبژاردن ناڕوونن

PUKMEDIA

یەکێتی

سەنتەری هەڵبژاردای یەکێتی ڕاگەیەنداوێک بڵاو دەکاتەوەو تێیدا دەڵێت: "ئەو مەرجانەى کە لە یاسای هەڵبژاردا هاتوون بۆ وردبینی کردن لە تۆمارى دەنگدەرانى کەرکوک نا روون و نادادپەوەرن، و هەروەها ناحەقى زۆرى تێدایە دژى نەتەوەى کورد لە پارێزگاى کەرکوک".

دەقی ڕاگەیەنداوەکە...

راگەیەندراوێک لە سەنتەرى هەڵبژاردنى کەرکوک-سەڵاحەدینى (ی.ن.ک)

کۆمەڵانى خەڵکى کوردستان..!
جەماوەرى کوردپەروەر و خۆڕاگرى کەرکوک و ناوچە جێناکۆکەکان..!
سەرەتا پەسەندکردنى یاساى هەڵبژاردنى ئەنجومەنى پارێزگاکان هەنگاوێکى گرینگە بەرەو ئەنجامدانى هەلبَژاردنى ئەنجومەنى پارێزگاکان. سەبارەت  بە هەڵبژاردنى ئەنجومەنى پارێزگاى کەرکوک کە بە هۆکارى سیاسى و نەتەوەیى لە ساڵى (2005)وە هەڵبژاردنى تێدا ئەنجام نەدراوە، بە گوێرەى ئەم یاسایە بڕیار وایە لەگەڵ پارێزگاکانى دیکەى عیراق ئەم ساڵ هەڵبژاردنى تێدا ئەنجام بدرێت. بەڵام ئەو مەرجانەى کە لە یاساکەدا هاتوون بۆ وردبینی کردن لە تۆمارى دەنگدەرانى کەرکوک نا روون و نادادپەوەرن، و هەروەها ناحەقى زۆرى تێدایە دژى نەتەوەى کورد لە پارێزگاى کەرکوک بەم شێوەیەى لاى خوارەوە:

1- ئەم مادە پەسەند کراوە هەمان ئەو مادەیە نییە کە دوو رۆژ لەمەوبەر بە رەزامەندى هەموو پێکهاتەکان ئامادەکراو رەوانەى دانیشتنى پەرلەمان کرا، بەڵام بەهۆى ئەنجام نەدانى دانیشتنەکە دەنگى لەسەر نەدرا.

2- راستە لە یاساکەدا سەرژمێرى (1957) کراوەتە یەکێک لە بنەماکانى تۆمارى دەنگدەران لە کەرکوک، بەڵام ئەوەى جێگەى مەترسییە لەسەر ئەم بنەمایە کە لە مادەیەکى پێشووترى یاساکەدا هاتووە کە هەر پارێزگایەک بە سنوورى ئیداریى ئێستاى بازنەیەکى هەڵبژاردنە، ئەمە ئەوە دەگەیەنێت راستە سەرژمێرى (1957) بنەمایە بەڵام بە سنوورى ئێستاى کەرکوک بە مەش دەنگدەرانى رەسەنى کەرکوک لە قەزاکانى: (چەمچەماڵ، و کەلار، و کفرى، و خورماتوو) کە لە ساڵى (1957) سەر بە ئیدارەى کەرکوک بوونە دەکەونە ژێر مەترسى سڕینەوە! سەبارەت بە زیادکردنى ناحیەى سەرگەڕان لەسەر داواى فراکسیۆنى بەکێتیى زیاد کران.

3- زیادکردنى بڕگەیەکى مەترسیدار بۆ مادەکە کە لە دوا ساتەکانى دەنگدان زیاد کراوە، مافى دەنگدان دەدات بەو کەسانەى کە لە پێش ساڵى (2003)وە فۆڕمى خۆراکیان لە کەرکوک بووە، بنەماى سەرژمێرى ساڵى (1957) بەتاڵ دەکاتەوە، بەوەش ئەو عەرەبە هاوردانەى کە لە پێش ساڵى (2003)وە لە کەرکوک بوونە دەتوانن دەنگ بدەن، ئەوەش پێچەوانەى بنەماى سەرژمێرى ساڵى (1957) کە لە کۆبوونەوەى سەرۆک و جێگرى پەرلەمان و سەرۆکى فراکسیۆنەکان کە شەوى رابردوو پەسەند کرا. ئەم بڕگەیەش بەبێ رەزامەندى فراکسیۆنى یەکێتیى لە دوا ساتەکاندا زیاد کرا و دواتر دەنگى لەسەر درا!

4- جێگیرکردنى ئەم بڕگەیەى پێش ساڵى (2003) لە بەرژەوەندى عەرەبى هاوردەیە لەسەر حیسابى ئەو دەنگدەرە کوردانەى کە بە هەر هۆکارێک فۆڕمى خۆراکیان کەرکوک نەبووە و خەڵکى ئەو شارۆچکانەن کە لە ساڵى (1957) سەر بە کەرکوک بوونە.

5- راستییەک هەیە کە پێویستە راى گشتى بیزانن کە فراکسیۆنى یەکێتیى بەشداریان لە دانیشتنى پەرلەماندا نەکرد بۆ ئەوەى نیساب تەواو نەبێت، بەڵام دواتر لایەنەکانى دیکە نیسابیان تەواو کرد چونکە پێشتر ژێر بە ژێر رێککەوتنیان لەسەر تێپەڕاندنى یاساکەدا کردبوو..! بەڵام دواتر بە ناچارى فراکسیۆنى یەکێتیى بەشدارى کۆبەوەنەوەکەى کرد بۆ ئەوەى بتوانێت بەرگرى لە خواست و مافەکانى دەنگدەرانى کوردى کەرکوک بکات.

6- جێبەجێکردنى ئەم یاسایە هەڕەشە لەسەر ژمارەیەکى دیارى دەنگدەرى کوردى کورکوک درووست دەکات و بە ناحەق ناوەکانیان دەخاتە ژێر مەترسى سڕینەوە!

7-  لە بەر ئەم هۆکارانە و ناڕوونى و نا دادپەرەوەرى ئەم بڕگانە، فراکسیۆنى یەکێتیى نیشتمانیى کوردستان دەنگى بەم مادەیە و کۆى یاساکە نەداوە، لە هەمان کاتدا دەنگدەرانى کوردى کەرکوک دڵنیا دەکەینەوە کە هەموو رێوشوێنە یاسایى و دەستووری و  سیاسییەکان دەگرینەبەر چ لە ناو ئەو لیژنەیەى کە بڕیارە درووست دەکرێت، چ لە دەرەوەى لیژنەکە لە پێناو بەرگریگردن لە خواست و مافە رەواکانى دەنگدەرانى نەتەوەى کورد لە کەرکوک.

8- بە داخەوە روون بووەوە کە لایەنێکى سیاسى بەرگرى لەم ماداەیە دەکات و کەرکوک خەڵکەکەى لە چوارچێوەى (سەفقەیەک)دا کرانە قوربانى دوو کورسى کۆتاى مەسیحی و زیادکردنى دەنگى حزبەکەى لە موسڵ لەسەر حیسابى دەنگدەرانى کوردى کەرکوک! لەوەش مەترسیدارتر ئەوەیە کە ئەو مادەیە وەکو دەستکەوت هەژمار بکرێت!!

9- تێپەڕاندنى یاساکە بەم شێوەیە،پێچەوانەى دەستوور و مادەى پێشووترى (35)ى یاساى هەڵبژاردنى پارێزگاکانە کە لە لایەن دادگاى باڵاى فیدراڵییەوە هەڵوەشێندرایەوە.
لە کۆتاییدا خەڵکى دلێر و خۆڕاگرى کەرکوک دڵنیا دەکەینەوە کە رووبەڕووى هەموو ئەو پیلانگێڕى و نادادییەى کە دەرهەق بە نەتەوەکەمان کراوە و دەکرێت ببینەوە،و هەموو رێوشوێنە دەستوورى و یاسایی و سیاسییەکان دەگرینەبەر،و نەتەوەکەمان لە کەرکوک و جێناکۆکەکان بە تەنها جێناهێڵین، کاتێکیش کە دەقى فەرمى ئەم یاسایە بڵاو دەکرێتەوە راستى و درووستى ئەو مەترسییانەى کە ئێمە هەمانە لەسەر ئەو مادەیە دەردەکەوێت.

هەروەها دەستخۆشى لە هەڤاڵانمان لە فراکسیۆنى یەکێتیى لە پەرلەمانى عیراق، و هەروەها هەڤاڵ خالید شوانى ئەندامى مەکتەبى سیاسى دەکەین لە بەرامبەر هەوڵ و ماندووبوونە بەردەوامەکانیان لە پێناو بەرگریکردن لە دۆزى رەواى نەتەوەکەمان لە  کەرکوک و ناوچە جێناکۆکەکان.

سەنتەرى هەڵبژاردنى کەرکوک-سەڵاحەدینى (ی.ن.ک)

PUKMEDIA