وتەبێژی ئین سلێمانی: فیستیڤاڵی نەورۆزی سلێمانی سەرکەوتووبوو

PUKMEDIA

شەقامی سالم

بەرنامەی پلاتفۆرمی ئین سلێمانی بۆ فیستیڤاڵی نەورۆز وەک خۆی جێبەجێ کراو، وتەبێژی پلاتفۆرمی ئین سلێمانیش دەڵێت: "بەراورد بە ساڵی رابردوو گەشتیارێکی زۆر زیاتر بۆ نەورۆز رویان لە سلێمانی کردووە".

هەژان هێرش وتەبێژی پلاتفۆرمی ئین سلێمانی تایبەت بە سایتی رەسمی یەکێتیی نیشتمانیی کوردستان PUKMEDIA رایگەیاند: "ئەو بەرنامەیەی بۆ فیستیڤاڵی نەورۆزی ئەمساڵی سلێمانی لەلایەن پلاتفۆرمی ئین سلێمانییەوە دانرابوو وەک خۆی جێبەجێ کراو سەرکەوتوو بوو، تەنها ئەوە نەبێت کەبەهۆی کەشوهەواوە ئاهەنگەکەی شەو لە شەقامی سالم نەکرا".

"بەهۆی ئەو فیستیڤاڵە گەورەیەی ئەمساڵ لە سلێمانی بۆ نەورۆز کرا ژمارەیەکی زیاتر لە ساڵی رابردوو گەشتیار رویان لە پارێزگاکە کردبوو، کەلە ئایندەدا ئامار و جیاوازییەکانی گەشتیاران بەراورد بە پار دەخەینە روو"، هەژان هێرش وایوت.

دەشڵێت: "لەگەڵ ئەوەی لە 17 ی مانگەوە چالاکییەکانی فیستیڤاڵی نەورۆز لە سلێمانی دەستیپێکردبوو ، بۆ یەکەم جار بوو لە فیستیڤاڵی نەورۆزدا ماراسۆنی نێودەوڵەتی ئەنجام بدرێت و خەڵاتی زۆر تایبەت بەسەر سەرکەوتواندا دابەش بکرێت".

ئەمەش لە کاتێکدایە بۆ یەکەم جار لە مێژووی سلێمانیدا لەلایەن سەرۆک کۆمار و سەرۆکی پەرلەمانی عیراقەوە ئاگری نەورۆز بکرێتەوە، لەهەمان کاتدا زیاتر لە 50 باڵوێز و کۆنسوڵ و دیبلۆماتکارانی وڵاتان لەنەورۆزی ئەمساڵی پارێزگای سلێمانیدا بەشداربوون.

PUKMEDIA