بەشێك لە وارسی ئەنفالكراوان لەبەردەم ئەنجومەنی وەزیران رۆژیان كردەوە

PUKMEDIA

گردبوونەوەی بەشێك لە وارسی ئەنفالكراوان لەبەردەم ئەنجومەنی وەزیران

ماوەی دوو رۆژە بەشێك لە وارسی ئەنفالكراوان بۆ داواكردنی شایستە داراییەكانیان لەبەردەم ئەنجومەنی وەزیران لە هەولێر گردبوونەوە و  داوای گەڕاندنەوەی مووچەكانیان دەكەن كەماوەی دوو ساڵە بەبیانووی دوو مووچە بڕدراوە، ئەندامێكی پەرلەمانی كوردستانیش دەڵێت: "حكومەت و وەزارەتی شەهیدان كەمتەرخەمن".

مەلا ناسر ئەحمەد ئەندامی پەرلەمانی كوردستان لە فراكسیۆنی یەكێتیی نیشتمانیی كوردستان لە لێدوانێكیدا بۆ سایتی رەسمی یەكێتی PUKMEDIA رایگەیاند: "حكومەت بەرامبەر وارسی شەهید و ئەنفالكراوان كەمتەرخەمە، تەنانەت ئەو شایستە داراییە كەمەشیان پێ رەوانابینێت، لە كاتێكدا وارسی شەهیدانی شارەكانی دیكەی عیراق هەموو ماف و ئیمتیازاتێكیان پێدراوە".

یەكێتی داوای باشكردنی ژیانی وارسی ئەنفالكراوان دەكات بەڵام حكومەت بێ وەڵامە

"نوێنەرانمان وەك فراكسیۆنی یەكێتی لە لیژنەی شەهیدان چەندین جار داوای باشتركردنی ژیانی وارسانی ئەنفالكراوان و شەهیدانیان كردووە، بەڵام لەلایەن حكومەتەوە هیچ وەڵامێكیان نەدراوەتەوە و وەزیری شەهیدانیش لە خزمەتكردنی وارسی شەهیدا كەمتەرخەمە" مەلاناسر ئەحمەد وایوت.

راشیگەیاند: "وارسی ئەنفالكراوان مافی خۆیانە هەموو رێكارێكی مەدەنی بۆ داواكردنی مافەكانیان بگرنەبەر و داوای ئەو ماف و ئیستحقاقانە بكەن كە وارسی شەهیدانی عیراق هەیانە".

PUKMEDIA