ئین سلێمانی گەشتیار بۆ نەورۆز رادەكێشێت

PUKMEDIA

ئین سلێمانی

لە هەرێمی كوردستان ئامادەكارییەكان بۆ پێشوازی لە جەژنی نەورۆز و ساڵی نوێی كوردی لەسەرجەم شارو شارۆچكەكان دەستیپێكردووەو  پێشبینی دەكرێت گەشتیارێكی زۆر لەو رۆژانەی نەورۆزدا روو لە هەرێم بكەن و گۆرانكارییەكانی كەشوهەواش چالاكییەكانی ئین سلێمانی راناگرێت.

بارانبارین چالاكییەكانی ئین سلێمانی راناگرێت

پلاتفۆڕمی ئین سلێمانی چالاكییەكانی بۆ نەورۆز دەستپێكردووەو پلانكاری تایبەتی بە چالاكییەكان داناوەو یادێكی تایبەتتر بەراورد بە ساڵانی رابردوو دەكاتەوە.

پلاتفۆڕمی ئین سلێمانی لە رۆژی 17ی مانگەوە چالاكییەكانی دەستپێكردووەو هەرچەندە بەپێی پێشبینییەكانی كەشوهەوا پێدەچێت شەپۆلی باران روو لە هەرێم بكات، وتەبێژی پلاتفۆڕمەكەش دەڵیت: "لە ئەگەری باران بارینیشدا چالاكییەكانمان بەردەوام دەبێت".

هەژان هێرش وتەبێژی پلاتفۆڕمی ئین سلێمانی لە لێدوانێكیدا بۆ سایتی رەسمی یەكێتیی نیشتمانیی كوردستان PUKMEDIA رایگەیاند: "لە رۆژی 17ی مانگەوە چالاكییەكانی ئین سلێمانی دەستیپێكردووە و تا رۆژی  20 ی مانگ بەردەوام دەبن".

"لە ئێستادا ماركێتی ئین سلێمانی و نمایشی فیلم و یارییە كوردەوارییەكان لە پاركی ئازادی بەردەوامە سەعات 2ی پاشنیوەڕۆ تا 10ی شەو"، هەژان هێرش وایوت.

وتیشی: "لە ئەگەری باران باریندا كۆنسێرتی رۆژی 18ی مانگ لە شانۆی رۆمانییەوە دەگوازرێتەوە بۆ تەلاری هونەر و هەر گۆڕانكارییەكی تریش هەبێت لەڕێگای پلاتفۆڕمەكانمانەوە هاوڵاتیانی لێ ئاگادار دەكەیەنەوە".

گەشتیاری زیاتر روو لەسلێمانی دەكات

لە ساڵی رابردوودا لە ماوەی 10 رۆژدا بۆ جەژنی نەورۆز، زیاتر لە 100 هەزار گەشتیار سەردانی سلێمانییان كردووە و پێشبینی دەكرێت ئەو رێژەیە بەرزتربێتەوە.

ئارام شوانی وتەبێژی گەشتوگوزاری سلێمانی بۆ سایتی رەسمی یەكێتیی نیشتمانیی كوردستان PUKMEDIA  دەڵێت: "ساڵی رابردوو لە رۆژی 13 تا 23ی ئادار، ژمارەی ئەو گەشتیارانەی روویان لە شاری سلێمانی كردبوو 100 هەزار كەس بوون".

"پێشبینیمان وایە بۆ ئەمساڵ ژمارەیەكی زیاتر گەشتیار روو لە شاری سلێمانی بكەن و ئامادەكاری تەواو كراوە بۆ پێشوازیكردن "، وتەبێژی گەشتوگوزاری سلێمانی وایوت.

لە ساڵی 2022 دا، 2 ملیۆن و  500 هەزار گەشتیار روویان لە شاری سلێمانی كردووە لە كۆی 6 ملیۆن گەشتیار كە لە ساڵی پاردا روویان لە هەرێمی كوردستان كردبوو.

PUKMEDIA