یەكێتی یەكدەنگی بە زامنی مافەكانی كورد دەزانێت

PUKMEDIA

یەكێتی یەكدەنگی بە زامنی مافەكانی كورد دەزانێت

یەكێتیی نیشتمانیی كوردستان یەكهەڵوێستی و یەكدەنگی كورد لەبەغدا كردووەتە ئەولەویەتی كارەكانی و هەنگاوی كرداری بۆناوە، بەدەستهێنانی شایستە دارایی و دەستوورییەكانی كوردستان-یش بە ئەركی سەرەكی لایەنە كوردییەكان دەزانێت.

 بافڵ جەلال تاڵەبانی سەرۆكی یەكێتیی نیشتمانیی كوردستان بەردەوام تەئكید لە یەكدەنگی كورد لە بەغدا و چارەسەركردنی كێشەكانی نێوان هەرێم و بەغدا بەپێی دەستوور دەكاتەوە و لەدواین كۆبوونەوەی لەگەڵ محەمەد شیاع سودانی سەرۆكوەزیرانی عیراق رایگەیاند: "پێویستە كێشەكانی نێوان هەرێم و بەغدا بەشێوەیەك چارەسەربكرێن كە مافە دەستوورییەكانی گەلی كورد تێیدا پارێزراوبن".

یەكگرتوویی كلیلی چارەسەرە

سۆزان مەنسور وتەبێژی فراكسیۆنی یەكێتیی نیشتمانیی كوردستان لە ئەنجومەنی نوێنەرانی عیراق لە لێدوانێكیدا بۆ سایتی رەسمی یەكێتی PUKMEDIA رایگەیاند: "پێویستە فراكسیۆنە كوردییەكان لە بەغدا یەك دەنگبن تاكو بتوانین بە كۆدەنگی مافی میلەتەكەمان فەراهەم بكەین و نابێت ئەوە لەیاد بكەین كە بەدەستهێنانی شایستە دارایی و دەستوورییەكانی كوردستان ئەركی سەرەكیمانە لە بەغدا".

"یەكێتیی نیشتمانیی كوردستان لە بەغدا هەوڵی زۆری بۆ كۆدەنگی لایەنە كوردییەكان داواوە و یەكگرتوویی بە كلیلی چارەسەر دەزانێت" سۆزان مەنسور وادەڵێت.

یەكهەڵوێستی كورد بەگرنگ دەزانرێت

بارودۆخەكە وا دەخوازێت فراكسیۆنە كوردستانییەكان لە بەغدا یەكدەنگ و یەكهەڵوێستبن تاوەكو بتوانن لە پڕۆژە یاسای بودجەی عیراق مافە دەستوورییەكانی خەڵكی هەرێمی كوردستان جێگیر بكەن.

كاروان یاروەیس بڕیاردەری فراكسیۆنی یەكێتی لە ئەنجومەنی نوێنەرانی عیراق لە لێدوانێكیدا بۆ سایتی رەسمی یەكێتیی نیشتمانیی كوردستان PUKMEDIA رایگەیاند: "كۆدەنگی لایەنە كوردییەكان لەسەر بودجەی عیراق گرنگە، چونكە بودجە شایستەی دەستووری خەڵكی كوردستانە و دۆخەكە وادەخوازێت پەرلەمانتارانی كورد لە بەغدا یەكگرتووبن بۆ ئەوەی بتوانن لۆبی بكەن و ئەو بڕگانەی پەیوەندیان بە شایستە دەستورییەكانی خەڵكی كوردستانەوە هەیە بەبێ كێشە لە ئەنجومەنی نوێنەران تێبپەڕێندرێن".

"یەكێتیی نیشتمانیی كوردستان پێی وایە دەبێت كورد لەبەغدا یەكدەنگبێت و بەپڕاكتیكیش كاری بۆ كردووە، بۆیە دەبێت لایەنە كوردییەكان بزانن ئەركیان قورسە و دەبێت جیاواز لە حزبایەتی و بیری تەسكی سیاسی كار بۆ كۆدەنگی كورد لە بەغدا بكەن" كاروان یاروەس وادەڵێت.

یەكێتیی نیشتمانیی كوردستان ئامانجی یەكخستنی دەنگی كوردە لەبەغدا و دەیەوێت بەپێی یاسا و دەستوور كورد ماف و ئیمتیازاتەكانی لەپێناو خوشگوزەرانی زیاتری خەڵكی هەرێمی كوردستان لەعیراق بەدەستبهێنێت و هەوڵەكانیشی لەوچوارچێوەیەدا چڕكردووەتەوە.

PUKMEDIA