سەرۆک بافڵ: یەکێتی باوەڕی تەواوی بەهەماهەنگی و کاری پێکەوەیی هەیە

نووسینگەی سەرۆكی یەكێتی

بافڵ جەلال تاڵەبانی سەرۆکی یەکێتی و تێری ۆڵف راوێژکاری باڵای سەرۆکی ئەمریکا

بافڵ جەلال تاڵەبانی، سەرۆکی یەکێتیی نیشتمانیی کوردستان لە پەراوێزی بەشداریکردن لە دیداری سلێمانی، چاویکەوت بە وەفدێکی باڵای ئەمریکا بە سەرۆکایەتی تێری ۆڵف، راوێژکاری باڵای سەرۆکی ئەمریکا بۆ کاروباری رۆژهەڵاتی ناوەڕاست.

لە دیدارێکدا سەرۆک بافڵ جەلال تاڵەبانی هەڵوێستی یەکێتی لەبارەی کۆی هاوکێشە سیاسی، ئابووری و ئەمنییەکانی عیراق و هەرێمی کوردستان روونکردەوە و جەختی لە بەردەوامیی دیالۆگ و هەوڵە ئەرێنییەکانی نێوان هەرێم و عیراق کردەوە لەپێناو تێپەڕاندنی بەربەستەکان و چارەسەرکردنی یەکجارەکانی کێشەکان.

لەبارەی کێشە سیاسی و ئیدارییەکانی هەرێم و هەوڵەکانی یەکێتی لەپێناو تێپەڕاندنی ناکۆکییەکان سەرۆک بافڵ وتی، یەکێتی باوەڕی تەواوی بە هەماهەنگی و کاری پێکەوەیی هەیە، دەشمانەوێت لەو چوارچێوەیەدا کێشەکان چارەسەر بکەین و بە ئاڕاستەی بەرەوپێشچوونی هەرێم و خزمەتکردنی خەڵکەکەمان هەنگاو بنێین.

پرسی وزە و هەنگاوەکانی یەکخستنەوەی هێزی پێشمەرگە تەوەرێکیتری دیدارەکە بوو و لەو بارەیەوە سەرۆک بافڵ رایگەیاند، دەبێت وزە لەخزمەتی گشتیدا بێت و داهاتەکەشی لەپێناو خۆشگوزەرانی هاوڵاتیاندا بێت. وتیشی، بۆ یەکخستن و رێکخستنەوەی هێزی پێشمەرگە هەنگاوی کرداریمان ناوە و ئامانجمان هێزێکی نیشتمانی و تۆکمەیە، بۆ ئەمەش پشتیوانیی هاوپەیمانان بەتایبەت ئەمریکا بە گرنگ دەزانین.

PUKMEDIA