دیداری سلێمانی ئاڵنگارییەكانی عیراق و ناوچەكە دەخاتەڕوو

PUKMEDIA

بافڵ جەلال تاڵەبانی سەرۆكی یەكێتی و محەمەد شیاع سودانی سەرۆك وەزیرانی عیراق

دیداری سلێمانی بە دروشمی (پاش 20 ساڵ عیراق و ناوچەكە لەنێوەندی ئاڵنگارییە جیهانییە نوێیەكان)، دەستیپێكرد و بافڵ جەلال تاڵەبانی سەرۆكی یەكێتیی نیشتمانیی كوردستان و وەفدێكی باڵا پێشوازی لە میوانەكان دەكات و هەریەك لە محەمەد شیاع سودانی سەرۆك وەزیرانی عیراق و نێچیرڤان بارزانی سەرۆكی هەرێم و جێنین پلاسخارت نێردەی تایبەتی سكرتێری گشتی نەتەوە یەكگرتووەكان و فایەق زێدان سەرۆكی ئەنجومەنی باڵای دادوەری عیراق و ژمارەیەكی زۆر لە سەرۆك و سەركردەی حزب و لایەنە سیاسییەكانی هەرێم و عیراق و باڵیۆز و كونسوڵی وڵاتان و ژمارەیەكی بەرچاو لە دیپلۆماتكاران گەیشتنە سلێمانی و بەشداری لە حەوتەمین دیداری سلێمانی دەكەن كە بڕیارە دوو رۆژ بەردەوامبێت.

ئەمڕۆ 15-3-2023 بۆ جاری حەوتەمە زانكۆی ئەمریكی لەسلێمانی دیداری لەم جۆرە ساز دەكات و تێیدا بابەتەكانی وەك سیاسەت، ئابوری، ژینگە، یاسا، مافی مرۆڤ، تەندروستی، وزە و چەندین پرسی دیكەی گرنگ باس دەكرێن.

لەماوەی دوو رۆژی دیدارەكەدا كەسانی بیرمەندو وپسپۆڕ‌ و شارەزا و بڕ‌یاربەدەستانی ناوچەكە و جیهان كۆدەبنەوە بۆ گفتوگۆكردن لەبارەی پرسە هەر دیارە ناوچەییەكانی جیهان و خستنەڕ‌ووی بیروبۆچوونەكانی ئێستا و ئەو خاڵانەی جێی ناكۆكین، ئەمە دەرفەتێكی دەگمەنە بۆ كۆكردنەوەی كەسانی خاوەن بەرژەوەندی لەكاروباری هەرێمی لەگەڵ كەسانی بیرمەند و سیاسی، لەپێناو ئەنجامدانی گفتوگۆیەكی سیاسی و ستراتیژی كەلە جیهانی ئەمڕ‌ۆكەدا جێی بایەخ و گرنگیپێدانن. 


دیداری سلێمانی لەلایەن راگەیاندنەكانەوە گرنگییەكی بەرچاوی پێ دەدرێت و چەندین چاوپێكەوتن و ئاڵوگۆڕ‌ی زانیاری لەگەڵ كەسایەتییە دیارەكاندا ئەنجام دەدرێت كە دواجار پێشنیار و چارەسەر بۆ پێشهات و كێشە ناوخۆیی و جیهانییەكان دەخرێنەڕ‌و. 

دروشمی ئەمساڵی دیدارەكە بریتییە لە "پاش 20 ساڵ عیراق و ناوچەكە لەنێوەندی ئاڵنگارییە جیهانییە نوێیەكان".

جگە لەبەشداربووانی ناو دیدارەكە، ژمارەیەكی زۆر لە رۆژنامەنوس و كەناڵی راگەیاندنی ناوخۆ و بیانی سەرقاڵی رووماڵكردنن و وەك روداوێكی گرنگی راگەیاندن لێی دەڕ‌وانرێت. 

دیداری سلێمانی هەوڵدەدات بیرۆكە و گفتوگۆكان وەربگێڕ‌ێتە سەر كردار و سیاسەتی كۆنكرێتی كە بتوانێت گۆڕ‌انكاری لە ژیانی خەڵكدا دروست بكات.

دیداری سلێمانی، كۆنفرانسێكی ئاستبەرزی سیاسییەو تیشك دەخاتە سەر رۆژهەڵاتی ناوەڕ‌است و ئەفریقای باشور و لەلایەن پەیمانگای لێكۆڵینەوە هەرێمی و نێودەوڵەتییەكان (IRIS)  ساڵانە لەزانكۆی ئەمریكی لە سلێمانی بەڕ‌ێوەدەچێت، بۆ ئەمساڵیش دیدارەكە لەرۆژانی 15 و 16ی 3ی 2023 كە هاوكاتە لەگەڵ ساڵیادی ئازادكردنی عیراق لەلایەن ئەمریكاوە بەئامادەبوونی چەندین كەسایەتی سیاسی و بیرمەندو وپسپۆڕ‌ و شارەزا دەستیپێكرد.

یەكەمین دیداری سلێمانی لە ساڵی 2013 لە زانكۆی ئەمریكی رێكخرا بە ناونیشانی "گۆڕانی جیۆپۆلیتیكی رۆژهەڵاتی ناوەڕاست"، هەروەها ساڵی 2014 دیداری دووەم و ساڵی 2015 دیداری سێهەم و 2016 دیداری چوارەم و 2017 دیداری پێنجەم و 2019 دیداری شەشەم رێكخراوە و بەهۆی پەتای كۆرۆناوە ساڵی 2020 تا ساڵی 2022 دیداری سلێمانی رێكنەخراوە، لە ساڵی 2023 دا، حەوتەمین دیدار لەژێر ناونیشانی "پاش 20 ساڵ عیراق و ناوچەكە لەنێوەندی ئاڵنگارییە جیهانیە نوێیەكان" رێكدەخرێت.

PUKMEDIA