ئەنجومەنی سەركردایەتی: پەیوەندییەكانی یەكێتی روو لەگەشەیە لەگەڵ هێزە سیاسییەكان

PUKMEDIA

لۆگۆی یەکێتیی نیشتمانیی کوردستان

ئەمڕۆ (١٤/٣/٢٠٢٣) ئەنجومەنی سەرکردایەتی یەکێتی نیشتمانی کوردستان بە سەرپەرشتی سەرۆک بافڵ جەلال تاڵەبانی کۆبۆوە.

ئەنجومەنی سەرکردایەتی لە کۆبوونەوەی ئاسایی خۆیدا کە لە هۆڵی کۆبوونەوەکانی سەرکردایەتی سازکرا، وێڕای رێزگرتن لە یادی قوربانیانی کارەساتی هەڵەبجە کە تاوانێکی بێ وێنەی رژێمی دیکتاتۆری بەعس بوو دژ بە گەلەکەمان، و ناردنی درود و سڵاو بۆ گیانی پاکی شەهیدانی کارەساتەکە و سەرجەم شەهیدانی کوردستان، پیرۆزبایی لە خەڵکی خۆڕاگری پارێزگاکە کرد بە بۆنەی بڕیاری بەرەسمی ناساندنی هەڵەبجە وەک پارێزگای (١٩) هەمین لە عیراقدا، دەستخۆشی لە حکومەتی ئیتیحادی کرد کە رەمزیەتی ئەم بڕیارە قەرەبوویەکی مەعنەوییە بۆ کۆمەڵانی خەڵکی شارەکە و هاندەریشە تاوەکو لە هەموو ئاستەکان قەرەبووی ئاوەدانکردنەوە و ساڕێژکردنی برینەکانی هەڵەبجە بکرێت.

لە کۆبوونەوەکەدا بە تێروتەسەلی گفتوگۆ لەسەر دۆخی سیاسی هەرێم و عیراق کرا، بە تایبەت پەیوەندی روو لە گەشەکردوی یەکێتی لەگەڵ هێزە سیاسیەکانی کوردستان و بەغدا، لەم بارەیەشەوە هەڤاڵ بافڵ سەرۆکی یەکێتی ئاماژەی بە سەرکەوتنی سیاسەتی یەکێتی لە ئاستی کوردستان و عیراق کرد کە بەرهەمی یەک هەڵوێستی و یەک بڕیاری سەرکردایەتییە و بۆتە راستییەکی حاشاهەڵنەگر لای دۆستەکانی یەکێتی لە ناوەوە و دەرەوەشدا.

لە بەشێکی تری کۆبوونەوەکە گفتوگۆ لەسەر کاروباری رێکخراوەیی ئۆرگانەکان و رێوشوێنی پێشخستنیان، کرا.
PUKMEDIA