په‌رله‌مانتارێكی یه‌كێتی: له‌ 16ی 3 دا چاوه‌ڕوانی به‌پارێزگابوونی هه‌ڵه‌بجه‌ین

PUKMEDIA

مۆنۆمێنتی شەهیدانی هەڵەبجە

چاوه‌ڕوانده‌كرێت رۆژی 16 ی ئادار له‌ ساڵیادی كیمیابارانی هه‌ڵه‌بجه‌دا، بڕیار له‌سه‌ر به‌پارێزگابوونی شاره‌كه‌ له‌لایه‌ن ئه‌نجومه‌نی وه‌زیرانی عیراقه‌وه‌ بدرێت، ئه‌ندامێكی ئه‌نجومه‌نی نوێنه‌رانی عیراقیش ده‌ڵێت: "دانپێدانانی به‌پارێزگابوونی هه‌ڵه‌بجه‌ له‌لایه‌ن به‌غداوه‌ له‌ئه‌وله‌ویه‌تی كاره‌كانمان بووە‌".

چرۆ حه‌مه‌ شه‌ریف ئه‌ندامی ئه‌نجومه‌نی نوێنه‌رانی عیراق له‌ فراكسیۆنی یه‌كێتی به‌سایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند:"وه‌ك نوێنه‌ری هه‌ڵه‌بجه‌ییه‌كان له‌ په‌رله‌مانی عیراق له‌ 18-1-2023، داوای ته‌واوكردنی رێكاره‌كانی به‌پارێزگابوونی هه‌ڵه‌بجه‌م ئاڕاسته‌ی سه‌رۆك وه‌زیرانی عیراق كردوه‌".

" له‌ئێستادا نوسراوه‌كه‌مان گه‌یشتوه‌ته‌ ئه‌نجومه‌نی وه‌زیران و به‌پێی به‌دواداچوونه‌كانم هه‌وڵێك هه‌یه‌ بۆ ئه‌وه‌ی رۆژی 16 ی ئادار و له‌ ساڵیادی كیمیابارانی هه‌ڵه‌بجه‌دا، ئه‌نجومه‌نی وه‌زیرانی عیراق بڕیار له‌سه‌ر به‌پارێزگابوونی شاره‌كه‌ بدات"، چرۆ حه‌مه‌ شه‌ریف واده‌ڵێت.

پێشتریش محه‌مه‌د شیاع سودانی، سه‌رۆك وه‌زیرانی عیراق رایگه‌یاندبوو: "حكومه‌ت سوره‌ له‌سه‌ر جێبه‌جێكردنی بڕیاری به‌ پارێزگاكردنی هه‌ڵه‌بجه‌، كه‌ پێشتر له‌لایه‌ن ئه‌نجومه‌نی نوێنه‌رانه‌وه‌ په‌سه‌ند كراوه".

ته‌واوبوونی رێكاره‌كانی به‌پارێزگابوونی هه‌ڵه‌بجه‌ یه‌كێك بوو له‌و داواكارییانه‌ی یه‌كێتیی نیشتمانیی كوردستان كه‌له‌كاتی پێكهێنانی حكومه‌تی نوێی عیراق، له‌چوارچێوه‌ی پڕ‌ۆژه‌كه‌یدا پێشكه‌شی كردبوو، له‌ئێستاشدا رێكاره‌كان ته‌واوبوون و چاوه‌ڕوانده‌كرێت رۆژی 16ی ئاداری ئه‌مساڵ ئه‌نجومه‌نی وه‌زیرانی عیراق له‌سه‌ر ئه‌و پرسه‌ بڕیاربدات.
PUKMEDIA