له‌سلێمانی 200 كۆمپانیا به‌رهه‌مه‌كانیان نمایش ده‌كه‌ن

سولی ئێكس پۆ

پێنجه‌مین فێستیڤاڵی به‌هاره‌ له‌پێشانگای نێوده‌وڵه‌تی سلێمانی

پێنجه‌مین فێستیڤاڵی به‌هاره‌ له‌پێشانگای نێوده‌وڵه‌تی سلێمانی به‌به‌شداری 200 كۆمپانیای ناوخۆیی و ده‌ره‌كی به‌رده‌وامه‌و بڕیاره‌ 10 رۆژ به‌رده‌وام بێت.

فێستیڤاڵی ئه‌مساڵ جیاوازه‌

شه‌وقی عه‌بدولكه‌ریم جێگری به‌ڕێوه‌به‌ری پێشانگای نێوده‌وڵه‌تی سلێمانی به‌سایتی ره‌سمی یه‌كێتیی نیستمانیی كوردستان PUKMEDIA ی راگه‌یاند:" نزیكه‌ی 200 كۆمپانیا به‌ به‌رهه‌می جۆراوجۆر له‌فێستیڤاڵی نێوده‌وڵه‌تی به‌هاره‌دا به‌شدارن، ده‌كرێت بڵێین له‌فێستیڤاڵه‌كه‌دا هه‌موو جۆره‌ پێداویستییه‌كانی هاووڵاتیان به‌رده‌ستن".

" جیاواز ئه‌م فێستیڤاڵه‌ له‌گه‌ڵ فێستیڤاڵه‌كانی دیكه‌ ئه‌وه‌یه‌ كه‌ جێگه‌ی تایبه‌ت به‌یاریكردنی منداڵان دابینكراوه‌و خێزانه‌كان ده‌توانن منداڵه‌كانیانی لێ دابنێن تا بازاڕی ده‌كه‌ن". شه‌وقی عه‌بدولكه‌ریم وایوت

ساڵانه‌ ژووری بازرگانی سلێمانی فێستیڤاڵ ده‌كاته‌وه‌

پێش هاتنی مانگی ره‌مه‌زانی پیرۆز ژووری بازرگانی سلێمانی فێستیڤاڵی ساڵانه‌ ده‌كاته‌وه‌و ئامانج لێی ئه‌وه‌یه‌ هاووڵاتیان خوارده‌مه‌نی و پێداویستییه‌كانیان به‌ نرخێكی هه‌رزان و گونجاو بكڕن.

سیروان محه‌مه‌د لێپرسراوی ژوری بازرگانی سلێمانی به‌  PUKMEDIA ی راگه‌یاند:" هه‌موو ساڵێك پێش هاتنی مانگی ره‌مه‌زانی پیرۆز ئه‌م فێستیڤاڵه‌ ده‌كه‌ینه‌وه‌ كه‌ ئامانجمان لێی ئه‌وه‌یه‌ هاووڵاتیان خوارده‌مه‌نی و پێداویستییه‌كانیان به‌ نرخێكی هه‌رزان و گونجاوتر له‌ بازاڕه‌كان بۆ ئه‌و مانگه‌ پیرۆزه‌ ده‌ستبكه‌وێت".

"له‌ فێستیڤاڵه‌كه‌ چه‌ندین كۆمپانیای ده‌ره‌كی و ناوخۆیی به‌شدارن و بڕیاره‌ له‌رۆژی 9-3-2023 بۆ ماوه‌ی 10 رۆژ به‌رده‌وام بێت." سیروان محه‌مه‌د وایوت

فیستیڤاڵی به‌ھاره‌ له‌كاتێكدا سازده‌كرێت كه‌ نزیكه‌ له‌ جه‌ژنی نه‌ورۆز و مانگی ره‌مه‌زانی پیرۆز، له‌ ساڵانی رابردوودا 15 ھه‌زار ھاووڵاتی به‌شدارییان له‌ ڤێستیڤاڵه‌كه‌دا كردووه‌و چاوه‌ڕوانده‌كرێت ئه‌مساڵ ھاووڵاتی زیاتر به‌شداربن.

PUKMEDIA