سەرۆکی یەکێتی بانگهێشتی مەغریب دەکرێت

فۆتۆ:دەرباز ستار

حزبی سۆسیالیستی دیموكراتی هێزە میللیەكانی مەغریب بانگهێشتی سەرۆكی یەكێتی و وەفدێكی باڵا دەكات

حزبی سۆسیالیستی دیموكراتی هێزە میللیەكانی مەغریب بەرەسمی بانگهێشتی سەرۆكی یەكێتیی نیشتمانیی كوردستان و وەفدێكی باڵا دەكات بۆ مەغریب لە پێناو پەرەپێدانی زیاتری پەیوەندییە سیاسیی و دیپلۆماسیەكانی نێوان هەردوولا.

ئیدریش لەشكری سەرۆكی حزبی سۆسیالیستی دیموكراتی هێزە میللیەكانی مەغریب پێشوازی سەعدی ئەحمەد پیرە ئەندامی مەكتەبی ساسیی كرد.

"هەماهەنگی و كاری هاوبەشی یەكێتیی و حزبی سۆسیالیستی دیموكراتی هێزە میللیەكانی مەغریب"

ئیدریس لەشكر تەئكیدی لەتوندوتۆڵكردنی پەیوەندییەكانی نێوانیان كردەوە، بەتایبەتی هەماهەنگی و كاری هاوبەشی هەردوولا لە چوارچێوەی ئەندامێتیان لە رێكخراوی سۆسیالیست ئینتەرناسیونال و بەرەی هاوپەیمانی پێشكەوتنخواز وكۆڕبەندی پارتە سۆسیال دیموكراتەكانی وڵاتانی عەرەبی،  هەروەك جەختی لە گرنگی ئەو پەیوەندییە مێژوویانە كردەوە كە شانشینی مەغریب و كۆماری عیراق پێكەوە دەبەستێتەوە، كە لەم دواییانەدا بەكردنەوەی باڵیۆزخانەی شانشینی مەغریب لە كۆماری عیراق گەیشتە لوتكە، لە هەمانكاتدا ئاماژەی بە هەوڵەكانی یەكێتی نیشتیمانی كوردستان كرد بۆ سەقامگیری و یەكڕیزی و ئاوەدانكردنەوە هەرێمی كوردستان و عیراق و ناوچەكە .

سەرۆكی یەكێتیی بانگهیشتی رەسمی دەكرێت بۆ مەغریب

لەپێناو پەرەپێدانی زیاتری پەیوەندییەكان و قوڵكردنەوەی دۆستایەتی نێوان یەكێتی نیشتیمانی كوردستان و حزبی سۆسیالیستی دیموكراتی هێزە میللیەكانی مەغریب ، ئیدریس لەشكر سەرۆكی پارتەكە لە رێگەی هەڤاڵ سەعدی ئەحمەد پیرە-وە بە ڕەسمی بانگهێشتی سەرۆك و وەفدێكی باڵای یەكێتی نیشتیمانی كوردستانی كرد بۆ شانشینی مەغریبی عەرەبی-كرد 
لە تەوەرێكی تری دیدارەكەدا هەڤاڵ سەعدی ئەحمەد پیرە سوپاسی ئەو پێشوازییە گەرمە و بانگهێشتە ڕەسمییەكەی سەرۆكی حزبی سۆسیالیستی دیموكراتی هێزە میللیەكانی مەغریب-یكرد و تەئكیدیكردەوە كە یەكێتی نیشتیمانی كوردستان خوازیاری زیاتر بەرەو پێشبردنی ئەو پەیوەندییە مێژوویی و هەماهەنگیی و دۆستایەتییەی نێوان هەردوولایە ، پاشان هەڤاڵ سەعدی ئەحمەد پیرە  كورتەباسێكی لەبارەی بارودۆخی سیاسی و ئابوری وئەمنی لەبارەی عێراق بەگشتی و هەرێمی كوردستان بەتایبەتی خستەڕوو ، تەئكیدی كردەوە كە ئێستا عێراق لە دووبارە بنیاتنانەوەدایە گەڕاوەتەوە ئەو پێگە گرنگەی خۆی لە رۆژهەڵاتی ناوەڕاست و ناوەندە جیهانییەكاندا . 

حزبی سۆسیالیستی دیموكراتی مەغریب خاوەنی 35 كورسی پەرلەمانە

لە كۆبوونەوەكەدا هەریەكە لە خاتوو خەولە لەشكر لێپرسراوی مەكتەبی پەیوەنیدییەكانی حزب و جێگری سۆشیالیست ئینتەرناسیوناڵ ، ئەندامانی مەكتەبی سیاسی حزب (جەواد شەفیق، محەمەد غەدان ، مشیج قەرقوری ، مەهدی مزراوی )ئامادەی بوون .

هەڤاڵ سەعدی ئەحمەد پیرە و ئیدریس لەشكر هەردووكیان ئەندامی بۆردی سەرۆكایەتی هاوپەیمانی پێشكەوتنخوازن ، هەروەها ئێستا حزبی سۆسیالیستی دیموكراتی هێزە میللیەكانی مەغریب ئێستا لەدەرەوەی حكومەتن و پێشتر سەرۆكی پەرلەمانی مەغریب و چەندین وەزیری حكومەت لە حزبەكەی ئەوان بوون وە ئێستا خاوەنی ٣٥ كورسین لە پەرلەمانی مەغریب.

PUKMEDIA