رێز لە ژنانی میدیاكار و رۆژنامەنووسانی مەكتەبی راگەیاندن دەنرێت

فۆتۆ: حەمە عومەر

میدیاكار و رۆژنامەنووسانی مەكتەبی راگەیاندن

بەبۆنەی 8ی مارس رۆژی جیهانی ژنانەوە، مەكتەبی راگەیاندنی یەكێتیی نیشتمانیی كوردستان سوپاس و پێزانینی ئاڕاستەی سەرجەم رۆژنامەنووس و میدیاكار و كارمەندانی ژنانی كەناڵ و ئۆرگانەكانی یەكێتی كرد و لە رێوڕەسمێكدا بڕوانامەی رێزلێنانیان پێبەخشرا.

لە رێوڕەسمەكەدا كە لە كتێبخانەی چریكەی مەكتەبی راگەیاندن بەڕێوەچوو ستران عەبدوڵڵا لێپرسراوی مەكتەبی راگەیاندن لە وتەیەكدا رایگەیاند: "یەكێتیی نیشتمانیی كوردستان باوەڕی نەگۆڕی بە مافەكانی ژنان هەیە و پشتیوانی تەواویان دەكات لە بەرەوپێشچوونیان لە ئۆرگانە حزبی و حكومییەكان".

وتیشی: "یەكێتیی نیشتمانیی كوردستان لەو هێزە سیاسیانەیە كە رۆڵی ژنانی نادیدە نەگرتووە و هاوشانی پیاوان بەشداریان لە خەباتی سیاسی و پێشمەرگایەتیدا كردووە و لە قۆناغی حوكمڕانیشدا رۆڵی پۆستی بە ژنان داوە و پشكی دیاریكراویشی لە ناوەندی بڕیاری سیاسیدا پێداون".

لێپرسراوی مەكتەبی راگەیاندن رۆڵی ژنان و كچانی رۆژنامەنووس و راگەیاندن كارانی لە راگەیاندنی یەكێتیدا بەرز نرخاند كە جێدەستیان دیار و بەرچاوە و هەموو پشتییوانییەكیشی دووپات كردەوە بۆ پەرەپێدانی تواناكانیان".
دواتر لێپرسراوی مەكتەب و ئەندامانی مەكتەبی راگەیاندنی یەكێتی نیشتمانیی كوردستان خەڵاتی رێزلێنانیان بەخشییە لە ژنانی میدیاكار و رۆژنامەنووسانی یەكێتی.

PUKMEDIA