سەرۆكی پەرلەمان و سكرتێری نەتەوەیەكگرتووەكان: رێز لەمافی مرۆڤ و ئازادیەكان بگیرێت

PUKMEDIA

د.رێواز فایەق سەرۆكی پەرلەمانی كوردستان و ئەنتۆنیۆ گۆتێریس سكرتێری گشتی نەتەوەیەكگرتووەكان

د.رێواز فایەق سەرۆكی پەرلەمانی كوردستان و ئەنتۆنیۆ گۆتێریس سكرتێری گشتی نەتەوەیەكگرتووەكان تەئكید لە هەڵبژاردنێكی بێگەرد لە هەرێمی كوردستان دەكەنەوە و چارەسەركردنی كێشەكانی هەرێم و بەغدا بەگرنگ دەزانن.

رۆژی 2/3/2023 د. رێواز فایەق سەرۆكی پەرلەمانی كوردستان  و ئەنتۆنیۆ گۆتێرس سكرتێری گشتی نەتەوەیەكگرتووەكان لە تەلاری پەرلەمانی كوردستان كۆبوونەوە و گفتوگۆ كرا لە بارەی كێشەكانی ناوخۆی هەرێم و عیراق و تەئكید لە گفتوگۆ و دیالۆگ كرایەوە بۆ چارەسەری بنەرەتی و رێككەوتنی نێوان هەرێم و بەغدا كە بەرژەوەندی گەلانی عیراق لەبەرچاوبگرێت.

هەروەك لەتەوەرێكی دیكەدا هەردوولا باسیان لە بایەخی هەڵبژاردن و دیموكراسی و پاراستنی پرانسیپە باڵاكان كردەەوە و هاوڕابوون كە هەڵبژاردنێكی بێگەرد و ئازاد بۆ پەرلەمانی كوردستان لە هەرێمی كوردستان بكرێت و ئاستەنگەكان بە لێكتێگەیشتن تێبپەڕێندرێن و ناوەندە نێودەوڵەتیەكانیش رۆڵی سەرەكییان هەبێت لە چاودێریكردنی پرۆسەكەدا.

 تەوەرێكی دیكەی كۆبوونەوەكەی سەرۆكی پەرلەمان و سكرتێری گشتی نەتەوەیەكگرتووەكان، پرسی رەوشی مافەكانی مرۆڤ و فراوانتركردنی پانتایی ئازادیی بوو لە هەرێمی كوردستان و لەوبارەیەوە سكرتێری گشتی نەتەوەیەكگرتووەكان رایگەیاند: كە پێویستە لە هەرێمی كوردستان پاشەكشێ لە رەوشی مافەكانی مرۆڤ نەكات و ئازادییە گشتیەكان بەرتەسك نەكرێتەوە و رێزی تەواو لە بنەما دیموكراسیەكان بگیرێت.

لەلای خۆیەوە سەرۆكی پەرلەمان رایگەیاند:" كە پەرلەمانی كوردستان لەو بارەیەوە رۆڵی خۆی دەگێرێت "هەروەك تەئكیدی لە پاراستنی مافەكانی مرۆڤ و بەهەندوەرگرتنی راپۆرتە نێودەوڵەتیەكان و سەرنج و پێشنیازەكان بۆ گەشەپێدانی ئازادییەكان لە هەرێم كردەوە و سوپاسی سكرتێری گشتی نەتەوەیەكگرتوەكانیشی كرد بۆ پەرۆشی و سەرنجەكانی لەبارەی هەڵبژاردن لە هەرێم و پرسەكانی مافی مرۆڤ و ئازادییەكان.
PUKMEDIA