نوسینگەی قوباد تاڵەبانی: 10 ملیۆن دۆلار بۆ ئاوی دەربەندیخان دابیندەكرێت

PUKMEDIA

کۆبوونەوەی نوسینگەی قوباد تاڵەبانی و دەستەی سەرپەرشتیاری ناڕەزایی دەربەندیخان

كێشەی ئاوی خواردنەوەی دەربەندیخان چارەسەر دەكرێت و بڕی 10 ملیۆن دۆلار لەلایەن كۆمپانیای (ئار كی تێكت)-ەوە دابیندەكرێت و چەند بەش و هۆڵێك لە نەخۆشخانەی گشتی شەهید تۆفیق-یش نوێدەكرێتەوە.

نوسینگەی قوباد تاڵەبانی جێگری سەرۆك وەزیرانی هەرێم لە سلێمانی رۆژی 2-3-2023، لەگەڵ دەستەی سەرپەرشتیاری ناڕەزایی دەربەندیخان كۆبووەو تێیدا كۆمپانیای ( ئار كی تێكت) راسپێردرا و بە نوسراوی رەسمی ئامادەیی دووپاتكردەوە كە بە بڕی 10 ملیۆن دۆلار تەمویلی پرۆژەی ئاوی پاكی خواردنەوەی دەربەندیخان بكات.

هەر لەو كۆبوونەوەیەدا نوسینگەی جێگری سەرۆكوەزیران كۆمپانیای ناوبراوی راسپارد بۆ بەردەوامبوون لەسەر نوێكردنەوەی هۆڵی نەشتەرگەری و مانەوەی پزیشكان لە نەخۆشخانەی گشتی شەهید تۆفیق.

نوسینگەی جێگری سەرۆكوەزیران و دەستەی سەرپەرشتیاری نارەزایی دەربەندیخان چاودێری جێبەجێكردن دەكەن و هەر گرفێك دروست بێت كۆبوونەوە بۆ چارەسەری بەپەل  دەكرێت.

پێشتریش بۆ چارەسەری گرفتی كارەبای سنوورەكە، نوسینگەی سەرۆك وەزیران بڕیاریدا بە زیادكردنی سەعاتی كارەبا و لە رۆژی 14-2-2023ـەوە جێبەجێكراوە و بەردەوامە.

PUKMEDIA