بڕیاردەری فراکسیۆنی یەکێتی: نرخی بلیتی گەشتکردن دەبێت بەدینار

راگەیاندنی فرۆکەخانەی سلێمانی

فرۆکەخانەی سلێمانی

بەڕێوەبەری هێڵی ئاسمانی عیراقییە کۆمپانیاکانی هێڵی ئاسمانی رادەسپێرێت کەلەمەودوا فرۆشتنی بلیتی سەرجەم گەشتە ئاسمانییەکان بە دیناری عیراقی دەبێت، بە نرخی رەسمی بانکی ناوەندی، ئەمەش لەسەر داوای بڕیاردەری فراکسیۆنی یەکێتی لە ئەنجومەنی نوێنەرانی عیراق بووە.

کاروان یاروەیس بڕیاردەری فراکسیۆنی یەکێتی لە ئەنجومەنی نوێنەرانی عیراق بە سایتی رەسمی یەکێتیی نیشتمانیی کوردستان PUKMEDIA ی راگەیاند: " بەپێی وتەی بەرێوەبەری هێڵی ئاسمانی عیراقیە لەمەودوا فرۆشتنی بلیتی گەشتی فڕۆکە بە دیناری عیراقی دەبێت".

دەشڵێت: "بەپێی ئەو نرخە مامەڵە لەگەڵ دۆلار دەکەن کە بانکی ناوەندی عیراق دیاری کردوە کە 132 هەزار دینارە بۆ هەر 100 دۆلارێک و بلیتی هەموو گەشتەکانی هێڵی ئاسمانی عیراق دەگرێتەوە".

کاروان یاروەیس ئەوەشی خستەروو: "پێشتر بە نوسراو و پەیوەندی داوامان لە هێڵی ئاسمانی عیراقیە کردبوو کە نرخی فرۆشتنی بلیت بەنرخی بانکی ناوەندی عیراق بێت و کاتی گەشتەکان و خزمەتگوزارییەکانیان رێک بخەنەوە".

PUKMEDIA