بە ئەلکترۆنیکردنی مووچەی خانەنشینان لە سلێمانی سەرکەوتوو بوو

PUKMEDIA

وەرگرتنی مووچەی خانەنشینان

نزیکەی 1500 خانەنشین بە سیستمی ئەلکترۆنی لە پارێزگای سلێمانی مووچەیان پێدراو بەڕێوەبەری ئاماری پارێزگای سلێمانیش دەڵێت، "سیستمەکە سەرکەوتووبوو، هیچ گرفتێک لە سیستەمی دابەشکردنی مووچەی خانەنشینان بە ئەلکترۆنی دروست نەبوو".

شوان جەبار فەتاح بەڕێوەبەری ئاماری پارێزگای سلێمانی لە لێدوانێكیدا بە سایتی رەسمی یەكێتیی نیشتمانیی كوردستان PUKMEDIA ی راگەیاند: "دابەشکردنی مووچەی خانەنشینان بە سیستمی ئەلکترۆنی لە سلێمانی سەرکەوتووبوو، هیچ کێشەیەک دروست نەبووە و ئەو خانەنشینانەی کە لە سیستمەکەدا جێگیرکراون لە ماوەیەکی زۆر کەمدا خانەنشینیەکانیان وەرگرتووە".

"تەنها لەماوەی دوو رۆژدا بە سیستمی ئەلکترۆنی لە پارێزگای سلێمانی ملیارێک و 200 ملیۆن دینار پارە دراوە بە 1500 خانەنشین، پڕۆسەکەش بەردەوامی دەبێت هەتا ئەوکاتەی سەرجەم خانەنشینان لە سنووری پارێزگای سلێمانی لەو سیستمەدا جێگیردەبن"، بەڕێوەبەری ئاماری پارێزگای سلێمانی وایوت.

دەشڵێت: "لەو بانکەی کە دەستمان پێکردووە نزیکەی 12هەزار خانەنشین هەیە وپڕۆسەکە بووە بە ئەلکترۆنیکردنی مووچەی خانەنشینان، گروپ گروپ بەردەوام دەبێت هەتا سەرجەم خانەنشینانی سنووری پارێزگای سلێمانی بە سیستمی ئەلکترۆنی خانەنشینیەکانیان وەردەگرن".

بەپێێ زانیارییەکانی PUKMEDIA نزیکەی 40 هەزار خانەنشین لە سنووری پارێزگای سلێمانی هەیە و سەجەمیان لە سیستمی بە ئەلکترۆنیکردنی خانەنشینان جێگیر دەکرێن و پڕۆسەکەش لەئێستادا دەستیپێکردووە و نزیکەی 1500 خانەنشین لە دوو رۆژی رابردوودا بەو سیستمە مووچەیان وەرگرتووە.
PUKMEDIA