لەسەر رەخنەگرتنی خاوەنەكەی كۆمپانیایەك لە هەولێر دادەخرێت

PUKMEDIA

سەردار ئازاد خاوەنی كۆمپانیای ئەملاك

خاوەنی كۆمپانیایەك لە هەولێر بەهۆی بڵاوبوونەوەی ڤیدیۆیەك كەداوای جوانكردنی سیمای شارەكەی كردووە بەبێ یاسا و دادگا لقەكانی كۆمپانیاكەی دادەخرێن و خۆشی ئاماژە بەوە دەدات: "ئەگەر بە زووترین كات لقەكانی كۆمپانیاكەی نەكرێنەوە بەرەو دەرەوەی وڵات كۆچ دەكات"، ئەمەش لە كاتێكدایە پێشتر قونسوڵخانەی ئەمریكا باسی لە پێشێلكردنی مافی مرۆڤ لە هەرێم كردوە و هۆشداری لە بەرتەسككردنەوەی ئازادی رادەربڕین لە هەرێم داوە.

سەردار ئازاد خاوەنی كۆمپانیای ئەملاك لە هەولێر لە كۆنگرەیەكی رۆژنامەوانیدا رایگەیاند: "دوێنێ لە گرتەیەكی ڤیدیۆیدا رەخنەم لە پاركی پەپولە گرت و وتم پێویستی بە نویكردنەوەیە كەچی ئەمڕۆ بەڕێوەبەری ئەندازەی پاركەكانی هەولێر پەیوەندی پێوەكردم و داوای سڕینەوە ڤیدیۆكانی لێكردم، پاش سڕینەوەشیان بە بڕیاری قائیمقامی هەولێر چوار ئۆفیسی كۆمپانیاكەمان داخران و 12 كارمەندمان بێكار بوون".

راشیگەیاند: "پاش ئەوەی لەسەر ئەو بابەتە پەیوەندیم بە نەبەز عەبدولحەمید قائیمقامی هەولێرەوە كرد، پێی راگەیاندم تا دڵی بەڕێوەبەری ئەندازەی پاركەكانی هەولێر چاكنەكەیتەوە ئۆفیسەكانتان ناكرێنەوە، بۆیە دەپرسم بۆ دەبێت رەخنەبگریت و نان بڕاوت بكەن؟ كەسێكم لە پشت بوایە نەیانەتوانی دایخەن".

ئەوەشی راگەیاند: "ئەگەر لەم وڵاتە سەرۆكی حكومەت و داواكاری گشتی هەن بۆ ئەم نا یاساییە قبوڵ دەكەن؟ ئەگەر لە شەممەوە ئۆفیسەكانمان نەكرێنەوە دەرگاكانی دەشكێنم و ئەم وڵاتە جێدەهێڵم".

خاوەنی كۆمپانیای ئەملاك وتیشی: "رەخنەم لە پاركێك گرت كۆمپانیاكەیان پێداخستم، رەخنە لە حكومەت بگرم رەنگە نەمبیننەوە".

ئەمەش لە كاتێكدایە پێشتر كونسوڵخانەی گشتی ئەمریكا لە هەولێر رایگەیاندبوو: "ئەمریكا نیگەرانە لە پاشەكشێی مافەكانی مرۆڤ و ئازادی رادەربڕین و مافی پێكهاتەكان لە هەرێمی كوردستان".

PUKMEDIA