رابیحە حەمەد: یەکێتی بەرگریکاری مافی کوردانی فەیلییە

PUKMEDIA

رابیحە حەمەد

بڕیاری گواستنەوەی مەلەفی کوردانی فەیلی لە خانەی هاوڵاتی بیانی بۆ هاوڵاتیانی عیراق لەلایەن ئەنجومەنی وەزیرانی حکومەتی عیراقەوە دەردەچێت.

رابیحە حەمەد ئەندامی سەرکردایەتی یەکێتیی نیشتمانیی کوردستان بە سایتی رەسمی یەکێتیی نیشتمانیی کوردستان PUKMEDIA ی راگەیاند: "ئەمە هەنگاوێکی نوێ و گرنگە بۆ گەڕاندنەوەی ماف بۆ خاوەنەکەی، کوردانی فەیلی هاوڵاتی عێراقین و ئەبوو هەر لەدوای رووخانی دەسەڵاتی بەعسەوە لە ساڵی 2003 وە ئەو بڕیارە بدرایە".

دەشڵێت: "کوردانی فەیلی توشی راگواست بوون و ژمارەیەکیان لە گۆڕی بەکۆمەڵدا نێژراون و دەسەڵاتی بەعسی رووخاو دەستی گرتووە بەسەر موڵک و ماڵەکانیاندا".

"ئێمە لەسەرمانە هەقی کوردانی فەیلی بە ئامانەتەوە بدەین، چونکە ئەوان هاوڵاتی عیراقین و نابێت مەلەفیان لەسەر هاوڵاتیانی بیانی تۆمار کرابێت"، رابیحە حەمەد وایوت.

ئەوەش دەڵێت: "یەکێتیی نیشتمانیی کوردستان بەرگریکارێکی راستەقینەی مافی کوردانی فەیلییەو هەموو کات سەرۆک مام جەلال هەوڵەکانی لەو پێناوەدا چڕکردوەتەوەو لەو کاتەش کەسەرۆک کۆماری عیراق بوو توانیویەتی بەشێک لە مافەکانیان بۆ بگەڕێنێتەوەو مەکتەبێکی تایبەت بە پرسی کوردانی فەیلی بە سەرپەرشتی خوالیخۆشبوو عادل موراد دامەزاندبوو".

PUKMEDIA